Frábærum degi stelpnanna lauk með komu á merkt herbergi seint í gærkvöldi

Stelpurnar okkar komu til Ermelo í Hollandi laust eftir ellefu í gærkvöldi eftir frábæran dag heima á Íslandi þar sem þær æfðu á Laugardalsvelli og fengu svo magnaða kveðjustund í Leifsstöð.

Sjá einnig:Stelpurnar kvaddar með stæl | Myndir

Þegar komið var á hótelið í Ermelo þær sem íslenska liðið dvelur og æfir næstu tvær vikurnar að minnsta kosti biðu herbergin klár fyrir stelpurnar alveg fullbúin. Liðsstjórar Íslands voru búin að merkja hvert herbergi með myndum af leikmönnunum sem deila herbergi á meðan mótinu stendur.

Tólf herbergi eru fyrir íslenska liðið á hótelinu fyrir 22 leikmenn en Harpa Þorsteinsdóttir gistir skammt frá hótelinu ásamt eiginmanni sínum og nýfæddu barni þeirra. Hún kemur til móts við liðið á morgnanna en fær frá að hverfa þegar formlegri dagskrá er lokið á hverju kvöldi.

Nýliðarnir saman

Á meðal herbergisfélaga má nefna vinkonurnar og gleðigjafana Hallberu Gísladóttur og Fanndísi Friðriksdóttur sem hafa lengi deilt herbergi og þá eru Rakel Hönnudóttir og Sara Björk Gunnarsdóttir ávallt herbergisfélagar. Þær eru saman á sínu þriðja stórmóti en þær voru báðar ungar og efnilegar á EM 2009 í Finnlandi.

Nýliðarnir Agla María Albertsdóttir úr Stjörnunni og Ingibjörg Sigurðardóttir úr Breiðabliki deila herbergi á meðan EM stendur en báðar nældu sér í farseðilinn á mótið með frábærri frammistöðu í síðustu vináttulandsleikjunum fyrir Evrópumótið.

Annar EM-nýliði, Sigríður Lára Garðarsdóttir, gistir með Glódísi Perlu Viggósdóttur sem er á sínu öðru stórmóti og þá eru Valskonurnar Elín Metta Jensen og Málfríður Erna Sigurðardóttir herbergisfélagar.

Fyrsta æfing í dag

Stelpurnar þurfa að vera fljótar að ná áttum eftir þennan frábæra dag í gær því fyrsta æfing í Ermelo er klukkan 11.00 að staðartíma í dag. Þær verður fjölmiðlum veittur aðgangur að nokkrum leikmönnum og mun íþróttadeild flytja frekari fréttir af mótinu í dag.

Sjá einnig:Það sáust á tár á hvörmum stelpnanna okkar eftir að þær sáu þetta myndband

Sérstakt aukablað um EM fylgir Fréttablaðinu í dag þar sem farið er yfir allt það helsta um íslenska liðið og móthera þess í C-riðlinum.

Herbergisfélagar á EM 2017:

Sandra Sigurðardóttir og Anna Björk Kristjánsdóttir

Berglind Björg Þorvaldsdóttir og Arna Sif Ásgrímsdóttir

Hólmfríður Magnúsdóttir og Sonný Lára Þráinsdóttir

Ingibjörg Sigurðardóttir og Agla María Albertsdóttir

Elín Metta Jensen og Málfríður Erna Sigurðardóttir

Katrín Ásbjörnsdóttir og Sandra María Jessen

Hallbera G. Gísladótti og Fanndís Friðriksdóttir

Glódís Perla Viggósdóttir og Sigríður Lára Garðarsdóttir

Sif Atladóttir og Dagný Brynjarsdóttir

Sara Björk Gunnarsdóttir og Rakel Hönnudóttir

Guðbjörg Gunnarsdóttir og Gunnhildur Yrsa Jónsdóttir

Ekki missa af neinu tengdu stelpunum okkar á EM 2017 í Hollandi. Íþróttadeild 365 er með öflugt teymi fréttamanna á mótinu og færir ykkur allar nýjustu fréttirnar af íslenska liðinu. Fylgdu okkur á Facebook, Twitter og Snapchat (sport365).