Formaður Afstöðu telur að ekki sé um brot á siðareglum lögmanna að ræða

Formaður Afstöðu, félags fanga, telur að meðmælalisti félagsins af lögmönnum, sem lögmennirnir greiða 75 þúsund krónur árlega fyrir setu á,  sé ekki brot á siðareglum. Formaðurinn segir listann tilkominn vegna þess að alltof algengt sé að lögmenn sinni föngum með ófullnægjandi hætti.

Í umfjöllun Vísis um málið fyrr í dag kemur fram að lögmenn sem vilja komast á meðmælalista Afstöðu, félags fanga, þurfi að greiða fyrir það „hóflegt gjald,“ sem nú er ljóst að eru 75 þúsund krónur árlega. Siðareglur lögmanna kveða á um að þeim sé óheimt að greiða fyrir það að fá til sín skjólstæðinga.

Lögmenn á listanum greiða 75 þúsund krónur í árgjald

Í svari við skriflegri fyrirspurn blaðamanns Vísis segir Guðmundur Ingi Þóroddsson, formaður Afstöðu, að félagið hafi lengi haldið úti heimasíðunni domareiknir.is þar sem fangar og lögmenn geta reiknað út framgang afplánunar. Á síðunni er einnig áðurnefndur listi yfir lögmenn sem styrkja félagið.

„Það má taka það fram að það er ekki að ástæðulausu að við setjum upp þennan lista því það er allt of algengt að lögfræðingar sinni okkar félgasmönnum með ófullnægjandi hætti,“ skrifar Guðmundur.

„Lögmenn greiða 75.000 kr árgjald, í dag eru 10 lögmenn á listanum og hann er opinn almenningi.“

Þá segir Guðmundur að Afstaða telji að ekki sé um að ræða brot á siðareglum lögmanna og að þeir lögmenn, sem eiga sæti á listanum, telji svo heldur ekki vera.

„Þar sem um beina vísun er ekki að ræða telur Afstaða að ekki sé um að brot á siðareglum lögmanna að ræða. Þeir lögmenn á listanum virðast leggja sama skilning í ákvæðið. Afstaða mælir með umræddum lögmönnum en á endanum er það alltaf félagsmaður Afstöðu, eða sá sem treystir mati félagsins, sem velur sér lögmann.“

Félagið fær ekki opinbera styrki og því er innheimt fé af lögmönnum

Guðmundur segir Afstöðu enn fremur rekna fyrir „sjálfaflafé“ og fái ekki opinbera styrki. Þess vegna séu gjöld innheimt af lögmönnum sem vilja komast á lista félagsins en það sé þó ekki sjálfgefið að þeir lögmenn sem vilji greiða sett gjald komist á listann.

„Afstaða er rekin fyrir sjálfaflafé en fær ekki styrki frá hinu opinbera. Því er haft það fyrirkomulag á að heimta gjöld af þeim lögmönnum sem sækja um að komast á umræddan lista. Hins vegar er það stjórn Afstöðu sem tekur afstöðu til þess hverjir fá sæti á listanum, óháð umræddum greiðslum. Það er með öðrum orðum ekki sjálfgefið að lögmaður komist á listann þótt hann sé tilbúinn til þess að greiða gjaldið,“ skrifar Guðmundur.