Hefja gjaldtöku við Hraunfossa

Frá og með morgundeginum verður rukkað á bílastæðið við Hraunfossa í Hvítársíðu. Markmiðið með gjaldtökunni er að bæta aðstöðu við fossana.

Í tilkynningu frá landeigendum kemur fram að ekki sé verið að rukka fyrir aðgang að fossinum heldur sé þetta stöðugjald fyrir bílastæðin. Þannig verði ókeypis fyrir þá sem koma fótgangandi eða hjólandi að fossinum.

„Gjaldtöku verður stillt í hóf en fyrir 50 manna rútu verður aðstöðugjaldið 6 þúsund krónur sem gerir þá um 120 krónur á hvern farþega,“ segir í tilkynningunni.

Féð sem innheimtist verður nýtt til þess að bæta aðstöðu á bílastæðunum. Þá verða landverðir á staðnum til að stýra umferð á bílastæðinu, sjá um söndun og söltun og tryggja öryggi ferðamanna.