Fáar vísbendingar fyrir hendi við leitina að Rimantas

Lögreglan á höfuðborgarsvæðinu lýsir enn eftir Rimantas Rimkus, 38 ára. Hann er 187 sentimetrar á hæð, 74 kíló og með dökkt, stutt hár, að því er fram kemur í tilkynningu.

Ekkert hefur spurst til hans frá því um síðustu mánaðamót, en málið var tilkynnt til lögreglu 19. júní.

Leit að Rimantas hefur ekki skilað árangri, en fáar vísbendingar eru fyrir hendi. Rætt hefur verið við fjölmarga aðila vegna málsins, en ekki hefur tekist að varpa ljósi á ferðir Rimantas, eða hvar hann kunni að vera að finna. Ekki er grunur um að saknæmt athæfi hafi átt sér stað.

Þeir sem geta veitt upplýsingar um ferðir Rimantas eru beðnir um að hafa samband við lögreglu í síma 444-1000, en upplýsingum má einnig koma á framfæri í einkaskilaboðum á fésbókarsíðu Lögreglunnar á höfuðborgarsvæðinu.