Neyddi fórnarlamb sitt til að stofna smálánareikning

Héraðsdómur Reykjavíkur hefur dæmt mann í tveggja ára fangelsi fyrir rán, frelsissviptingu og önnur brot. Í eitt skipti kom hann inn í bifreið manns og hafði af honum fjármuni, meðal annars með því að neyða fórnarlambið til að stofna smálanareikning. Í annað skipti veittist hann að manni með með hníf, hafði í hótunum við hann og hafði af honum rúma eina milljón króna með millifærslu.

Tvö aðskilin brot

Í dómnum yfir hinum ákærða kemur fram að hann hafi svipt annað fórnarlamb sitt frelsi í tæpa fjóra klukkutíma. Hinn ákærði kom inn í bifreið manns, þar sem henni var lagt, og ógnaði honum með hnífi og hótaði að stinga hann ef hann ekki léti sig hafa fjármuni. Ákærði neyddi fórnarlambið til að gefa upp leyninúmer á bankareikning sínum en ákærði millifærði þá 42.000 krónur inn á reikning vinkonu sinnar.

Að því búnu neyddi ákærði fórnarlamb sitt enn til að aka að útibúi banka í Reykjavík þar sem ákærði tók 2000 krónur útaf bankareikningi fórnarlambs síns.

Því næst stofnaði ákærði til viðskipta í nafni fórnarlambs síns við smálánafyrirtæki og millifærði í kjölfarið lánsfjárhæð, tvisvar sinnum 20.000 krónur, af reikningi fórnarlambsins yfir á reikning fyrrnefndrar vinkonu sinnar. Því næst þvingaði ákærði fórnarlambið til að aka með sig um Reykjavík þar til hann yfirgaf bifreiðina um klukkan 19 og neyddi þá fórnarlambið til að láta sig hafa símann sinn, skó og jakka.

Þá var ákærði einnig dæmdur fyrir að veitast að öðru fórnarlambi með sambærilegu ofbeldi við Skautahöllina í Reykjavík í mars síðastliðnum. Vísir fjallaði um árásina á sínum tíma.

Hann ógnaði fórnarlambi sínu með hnífi og neyddi það til að fara inn á heimabanka sinn og millifæra rúmlega eina milljón króna yfir á reikning ákærða.

Játaði brotin og dæmdur í tveggja ára fangelsi

Ákærði hefur skýlaust játað brot sín. Sannað er með játningu ákærða og öðrum gögnum málsins að ákærði er sekur um þá háttsemi sem honum er gefin að sök.

Hann var dæmdur til tveggja ára fangelsisvistar og var þar að auki gert að greiða fórnarlömbum sínum samtals tæpar tvær milljónir í sakar- og málskostnað.