Vettel gæti fengið harðari refsingu eftir áreksturinn

Alþjóðakappaksturssambandið, FIA, gæti veitt Sebastian Vettell refsingu eftir að hann keyrði utan í Lewis Hamilton í Formúlu 1 í Aserbaísjan um helgina.

Málið er nú til skoðunar hjá sambandinu sem mun funda á mánudag. Niðurstaða verður komin fyrir austurríska kappaksturinn sem fram fer helgina á eftir.

Sjá einnig: Allt í bál og brand í Bakú | Sjáðu uppgjörsþáttinn

Vettel ók utan í bíl Hamilton eftir að honum fannst sá Bretinn hægja óþarflega mikið á sér en öryggisbíll var þá á brautinni.

FIA mun þó ekki taka ökulag Hamilton til skoðunar og dómarar keppninnar um helgina töldu ekki að ökulag Hamilton hafi verið refsivert.

Sjá einnig: Bílskúrinn: Blóðheitir í Bakú

Dómararnir ákváðu í keppninni að beita Vettel næstþyngstu refsingu sem hægt er, að láta Þjóðverjann stöðva í tíu sekúndur á þjónustusvæðinu. Þyngsta mögulega refsing hefði verið að dæma hann úr keppni.

Vettel náði þrátt fyrir það að koma á undan Hamtilton í mark og jók hann þar með forystuna á hann í baráttu þeirra um heimsmeistaratitilinn.

Hamilton þurfti sjálfur að koma inn á viðgerðarsvæðið þar sem að höfuðvörn hans hafði losnað. Líklegt er að Hamilton hefði annars unnið kappaksturinn en Daniel Ricciardo kom fyrstur í mark á Red Bull.