Griezmann búinn að framlengja við Atletico

Draumur stuðningsmanna Man. Utd um að fá Antoine Griezmann á Old Trafford dó í dag.

Þá skrifaði Griezmann undir nýjan samning við Atletico Madrid sem er til ársins 2022.

Er Man. Utd hafði tryggt sér sæti í Meistaradeildinni héldu margir stuðningsmenn United að það væri formsatriði að fá Griezmann. Frakkinn hafði talað þannig að hægt var að skilja að hugur hans stefndi þangað.

„Í fyrsta lagi vil ég biðja fólk afsökunar ef það hefur misskilið orð mín á sínum tíma,“ sagði Griezmann sem hafði víst beðið um að fá að fara frá Atletico.

„Frá fyrsta degi hef ég gefið Atletico allt sem ég á. Ég er mjög ánægður með að vera hér áfram.“

Atletico er í kaupbanni og má ekki kaupa leikmenn fyrr en í janúar. Því er það afar mikilvægt fyrir félagið að halda sínum lykilleikmönnum sínum.