Veislustjórinn lýsir brúðkaupinu: Aron Einar einlægur og mjúkur

„Það fylgir því ákveðin ábyrgð og vinna að vera veislustjóri. Ég hef aldrei gert þetta áður og sem betur fer var ég ekki einn í þessu og Kolfinna var mér til halds og traust. Þetta var bara mjög skemmtilegt,“ segir landsliðsmaðurinn Rúrik Gíslason sem var veislustjóri í brúðkaupi ársins á laugardaginn en hann var í viðtali í Brennslunni á FM957.

Kristbjörg Jónasdóttir, afrekskona í fitness, og Aron Einar Gunnarsson, fyrirliði íslenska landsliðsins í knattspyrnu, gengu í það heilaga síðdegis á laugardaginn. Athöfnin fór fram í Hallgrímskirkju. Hjónavígslunni verður að vonum ákaft fagnað að athöfninni lokinni í návist vina og ættingja en Kolfinna Von var veislustjóri á Korpúlfstöðum ásamt Rúrik.

„Það er gaman að vera svona stór partur af þessu brúðkaupi og hjálpað til. Ég var alls ekki að reita af mér bröndurunum og henti bara í einn tvo, that´s it. Þetta var ekkert smá vel heppnað og ég held að fólk hafi skemmt sér vel og dagskráin var mjög fjölbreytt og mikið að flottum tónlistarmönnum.“

Kristbjörg og Aron Einar hafa verið í sambandi í rúm fjögur ár og eiga þau soninn Ólíver Breka. Fjölskyldan er búsett í Cardiff í Wales þar sem Aron Einar spilar með liði borgarinnar. Kristbjörg kemur frá Reykjavík en Aron Einar kemur frá Akureyri þar sem hann tók sín fyrstu skref í knattspyrnu.

Myndir úr veislunni má sjá hér að neðan.

„Aron er mjög mjúkur gaur. Hann hélt ræðu sem endaði á því að Sverrir Bergmann söng lag til Kristbjargar. Hann þakkaði mömmu sinni og pabba og tengdaforeldrum sínu, og að sjálfsögðu Kristbjörgu líka. Það er alveg mjög mjúk hlið á honum, sem ég hef séð áður.“

Jökull í Kaleo mætti gagngert frá Bandaríkjunum til að koma fram í brúðkaupinu og flaug síðan strax í einkaflugvél til Amsterdam að spila á næstu tónleikum. Fresta þurfti fjölmörgum tónleikum sveitarinnar vegna veikinda Jökuls á dögunum, en það stöðvar ekkert brúðkaupið hjá þessu ofurpari. Jón Jónsson, Friðrik Dór Jónsson, Sverrir Bergmann, Skytturnar og Emmsjé Gauti komu einnig fram í brúðkaupinu.

„Þetta var rosaleg dagskrá og við hlógum bara að Solstice þarna,“ segir Rúrik.

Rúrik var í virkilega smekklegum og fallegum grænum jakkafötum og vöktu þau töluverða athygli.

Grænn en hrikalega töff

„Ég fíla svolítið að fara aðrar leiðir og er alltaf með ákveðið statement þegar kemur að klæðaburði. Það má alveg aðeins stokka þetta upp og menn voru þarna í bláu og svörtu og svo var einn grænn.“

Hann segir að trúðurinn í brúðkaupinu hafi verið Ólafur Ingi Skúlason.

„Hann var til að mynda mættur í dance off með Craig Noone, leikmann Cardiff, og það er eitthvað það fyndnasta sem ég hef séð og Óli Ingi sennilega með þeim fyndnari á Íslandi. Hann var klárlega trúðurinn en á góðan hátt.“

Hér að neðan má hlusta á viðtalið við Rúrik sem var í Brennslunni á FM957 og sjá myndir frá Hallgrímskirkju á laugardaginn.