Lýsir yfir áhyggjum af nýju greiðsluþátttökukerfi

Oddný Harðardóttir, þingmaður Samfylkingarinnar, lýsti yfir áhyggjum af nýju greiðsluþátttökukerfi í heilbrigðisþjónustu á Alþingi í dag. Hún sagði kostnaðaraukninguna í sumum tilfellum sláandi og óttast að fólk muni fresta læknisheimsóknum vegna þessa.

„Kostnaðaraukningin er í mörgum tilfellum er gríðarleg. Ástæða er því til að hafa áhyggjur vegna aukins kostnaðar fólks við að sækja sér heilbrigðisþjónustu þrátt fyrir nýtt kerfi. Mikil hækkun er líkleg til að fjölga þeim sem neita sér um heilbrigðisþjónustu enn frekar og þetta kemur verst niður á konum og fólki í lægstu tekjuhópunum,” sagði Oddný í sérstökum umræðum um nýja kerfið.

Stefna eigi að gjaldfrjálsu kerfi

Oddný vísaði til fréttar á heimasíðu ASÍ þar sem meðal annars er bent á að lækniskostnaður verði meiri hjá lífeyrisþegum en almennum sjúklingum.

„Fyrir þá sjúklinga sem þurfa mikla þjónustu reglulega mun kostnaðurinn í flestum tilfellum lækka og það er gott, en fyrir flesta aðra mun kostnaðurinn hækka. Til við bótar við þennan kostnað kemur meðal annars kostnaður vegna lyfja, tannlæknaþjónustu, sálfræðiþjónustu og hjálpartækja. Hækkunin er sláandi og hún er mun meiri hjá lífeyrisþegum en almennum sjúklingum,” sagði hún.

„Þetta er ekki gott kerfi. Gjaldfrjáls heilbrigðisþjónusta er það sem velferðarsamfélagið Ísland á að stefna að.”

Að öðru leyti var almennur stuðningur við nýja kerfið sem tók gildi síðastliðinn mánudag. Óttarr Proppé heilbrigðisráðherra, sem fór fyrir frumvarpi um nýtt greiðsluþátttökukerfi, fagnaði þessari samstöðu og sagðist jafnframt stefna að því að færa meðal annars lyfjakostnað, tannlæknakostnað, sálfræðikostnað og ferðakostnað undir þetta kerfi.