Lior Suchard les hugsanir í Eldborg

Lior Suchard, sem hefur hlotið viðurnefnið meistari hugans, kemur fram í Eldborgarsal Hörpu þann 9. maí næstkomandi. Hann hefur lag á að koma áhorfendum stöðugt á óvart með atriðum sem virðast stangast á við náttúrulögmálin. „Nú gefst Íslendingum í fyrsta skipti tækifæri til að kynnast þessum frábæra skemmtikrafti en hann hefur heillað hverja stórstjörnuna á fætur annarri upp úr skónum,“ segir tónleikahaldarinn Guðbjartur Finnbjörnsson.

„Hann segir svo virðast sem Lior Suchard geti lesið hugsanir. „Hann getur kafað niður í innstu hugarfylgsni fólks og vitað hvað það hyggst segja áður en það segir nokkuð. Í stórbrotnum sýningum hefur hann fært til hluti með hugaraflinu einu saman, lesið hugsanir manna, sagt fyrir um óorðna atburði og jafnvel haft áhrif á hugsanir margra áhorfenda í senn.“

Að sögn Guðbjarts er Suchard er talinn fremstur meðal jafningja þegar kemur að yfirskilvitlegum hæfileikum og hinn heimsfrægi Uri Geller hefur sagt Lior verðugan arftaka sinn.

Lior Suchard er eftirsóttur skemmtikraftur um allan heim og hefur sýnt í meira en 50 þjóðlöndum. Þá hefur hann margoft komið fram í helstu spjallþáttum í Bandaríkjanna. Þar á meðal fimm sinnum í „The Tonight Show“ þar sem hann hefur heillað fólk eins og James Spader, Kim Kardashian, Zac Efron, Taylor Lautner og Jimmy Fallon upp úr skónum. Jay Leno varð einnig furðu lostinn þegar hann snéri baki í Lior og velti teningi í lófanum, því ævinlega gat Suchard sagt með réttu hvað hlið teningsins snéri upp.

Guðbjartur segist alltaf hafa verið mikill aðdáandi Darren Brown. Ég datt svo niður á Suchard og fannst hann svo magnaður að ég átti ekki til orð. „Ég ákvað því að fá hann til landsins.“ Aðspurður telur Guðbjartur líklegt að Íslendingar kunni vel og meta. „Við erum þekkt fyrir að trúa á álfa, tröll og huldufólk og ég hef mikla trú á því að Suchard falli í kramið.“

Hér eru nokkur dæmi um viðbrögð þeirra sem hafa hlýtt á hann í gegnum tíðina:

 „Þetta er það magnaðasta sem ég hef nokkurn tíman séð. Og ég hef marga fjöruna sopið.“ – Larry King

„Ég hélt að ég hefði séð allt.“ – Bill Gates

„Algerlega stórbrotið! Þú kollvarpar öllu. Ég mun halda áfram að tala máli þínu hvert sem ég fer.“ – Tony Blair

„Algerlega ótrúlegt. Og fyndið. Ég gæti horft á þennan mann klukkutímum saman.“ – Alicia Keys

„Holy S%/&&! Þetta var stórkostlegt.“ – Leonardo DiCaprio

„Í sannleika sagt. Þetta er engu líkt. Hann gerir það að verkum að þú situr á stólbríkinni og svitnar af spenningi.“ – Rene Zellweger.

Hér fyrir neðan er myndbrot.

Allar nánari upplýsingar er að finna á Harpa.is