Vill meiri áherslu á tæknimenntun og nýsköpun

Íslendingar þurfa að leggja meiri áherslu á tæknimenntun og nýsköpun á komandi árum til að mæta þeirri þróun sem er að eiga sér stað í atvinnulífinu. Þetta segir Ragnheiður H. Magnúsdóttir er einn af stjórnendum hjá Marel.

Vinnumarkaðurinn var til umræðu hjá Kristjáni Kristjánssyni á Sprengisandi á Bylgjunni í morgun en þróun í tækni og vísindum getur sett venjuleg og hefðbundin störf sem við þekkjum í dag í hættu. Mikil þróun á eftir að verða í atvinnulífinu víða um heim á næstu 10-20 árum.

Ragnheiður H. Magnúsdóttir er einn af stjórnendum hjá Marel og á sæti í Vísinda og tækniráði Forsætisráðuneytisins. Ragnheiður segir að Íslands þurfa að fara bæta í í tæknimenntun og nýsköpun því á sama tíma og þessi tækni fer á fullt þá komi til með að verða þörf á skapandi hugsun.

„Þetta er alveg þannig að það er talið að mörg af þessum skrifstofustörfum séu bara komin í vandræði. Það muni bara í rauninni vélar og tækni taka yfir þar. Við erum að sjá róbótavæðingu alveg gríðarlega. Ég held samt sem áður að til dæmis iðnaðarmenn, ég held að þeirra störf séu ekki að fara neitt, en þau muni Breytast,“ segir Ragnheiður.

Helga Valfells fyrrverandi framkvæmdastjóri Nýsköpunarsjóða og núverandi forstjóri Crowberry Capital var einnig gestur Kristján Kristjánsson á Sprengisandi í morgun en hún sagði að Íslendingar þurfi ákveða hvort við ætlum að vera tæknineytendur eða tækniskapendur.

„Ég held að það sé miklu miklu skemmtilegra að taka þátt í því að skapa tæknina. Af því að það eru stór fyrirtæki út í heimi sem hafa grætt mikið á tækninni og það er frábært. Þú horfir á Google, Facebook, Amazon, Microsoft og Apple. Þau eru svolítið ráðandi í tækninni og ég held að við getum svolítið tekið völdin í okkar hendur með því að hlúa að uppbyggingu tækninnar.

Umræðuna úr Sprengisandi um þróun atvinnulífsins má heyra í heild sinni hér að ofan.