Óskar: Skömmin er hjá dómaramafíunni

Óskar Ármannsson þjálfari Hauka var ómyrkur í máli eftir að hans lið féll úr leik gegn Fram í undanúrslitum Olís-deildar kvenna. Hann sagði að hallað hefði á hans lið allt einvígið og talaði um dómaramafíu HSÍ.

„Fyrst og fremst langar mig að nefna gríðarlegt þakklæti til minna leikmanna fyrir að leggja svona mikið á sig. Þær eru búnar að standa sig gríðarlega vel og ég hef aldrei á mínum ferli séð lið standa í eins miklu mótlæti og þetta lið hefur þurft að gera í þessu einvígi. Ég vil skrifa það á ónákvæma dómaravinnslu á móti okkur,“ sagði Óskar í samtali við Vísi að leik loknum.

„Ég er búinn að taka saman aragrúa af atriðum þar sem við áttum að fá fjöldan allan af vítaköstum auk brottrekstra sem við höfum fengið. Nefndu það bara. Það er þessari dómaramafíu til háborinnar skammar og í raun algjör skandall að þetta skuli líðast leik eftir leik,“ bætti Óskar við.

Undir lok fyrri framlengingar fékk Sigrún Jóhannsdóttir leikmaður Hauka tækifæri til að koma Haukum tveimur mörkum yfir og tryggja sigur. Guðrún Ósk Maríasdóttir í marki Fram varði hins vegar frá henni og Fram tókst að jafna. Gestirnir voru afar ósáttir við að ekki skyldi vera dæmt víti þegar Sigrún fór í gegn og höfðu töluvert til síns máls.

„Eins og svo margt annað bæði í þessum leik og síðustu leikjum þá get ég ekki annað en talað um hreinan og beinan skandal. Þetta er algjör vanvirðing við mitt lið og mér finnst með ólíkindum, með ólíkindum að menn skuli ekki funda eftir hvern einasta leik og drullast til að taka sig saman í andlitinu. Þetta er gjörsamlega óþolandi að vinna undir svona kringumstæðum. Ég vil ítreka að Framliðið er fínt lið en mitt lið stóð sig eins og hetjur í þessu einvígi. Dómaramafíunnar er mesta skömmin í þessu.“

Óskar hélt áfram að tala um atriði sem hann vildi meina að hefðu komið niður á hans liði og meðal annars atvik í fyrsta leik liðanna þar sem Ragnheiður Júlíusdóttir skoraði sigurmark Fram beint úr aukakasti eftir að tíminn rann út.

„Í fyrsta leiknum skora þær tvo síðustu mörkin ólögleg. Það er með ólíkindum að Fram byrjar allar sínar hröðu miðjur með því að vera komnar 3-4 metrum innfyrir og skora þannig mörk í hverjum leik. Við erum að komast á milli þeirra og fáum brot og það eru fimm, sex eða sjö víti í hverjum einasta leik sem við fáum ekki. Svona er þetta búið að vera og miðað við það finnst mér með ólíkindum að stelpurnar hafi haldið haus. Mig langar bara að ítreka þakklæti og virðingu fyrir þessu liði.“

Eftir fyrri hálfleikinn í dag leiddu Haukar með sex mörkum en höfðu þá farið illa með nokkur dauðafæri og meðal annars þrjú hraðaupphlaup.

„Þegar maður fer að greina svona leiki þá eru svona atriði sem telja líka. Burt séð frá öllu tali um dómgæslu þá erum við með einhver tólf dauðafæri sem við klikkum á maður á móti markmanni. Bara helmingur af þeim hefði tryggt okkur eitthvað meira. Maður getur tekið svona atriði saman þegar er tapað með minnsta mun."

„Í lokin er auðvitað smá sök hjá sjálfum mér að fá tveggja mínútna brottvísun. Mér fannst ég fá þá brottvísun fyrir saklausa ábendingu. Auðvitað á ég sem reynslumikill þjálfari að vera skynsamari,“ bætti Óskar við en hann fékk brottvísun undir lok fyrri framlengingar og einum færri lentu Haukar þremur mörkum undir í upphafi seinni framlengingar.

Óskar mun nú hætta þjálfun Haukaliðsins og Elías Már Halldórsson tekur við en hann hefur leikið með karlaliði Hauka um árabil. Óskar átti ekki von á miklum breytingum á liðinu.

„Mér skilst að beinagrindin að liðinu verði sú sama, ég veit ekki með Ramune og hún verður að svara því sjálf hvað hún gerir. Hún er einstakur leikmaður en ég hef bent á og við höfum hugað að því að það þarf að byggja upp nýtt lið án hennar,“ sagði Óskar og var alveg með á hreinu hvaða lið myndi hampa Íslandsmeistaratitlinum þegar blaðamaður spurði.

„Ég held að Grótta hampi titlinum,“ sagði Óskar að lokum.