Léttist um 85 kíló en safnar nú fyrir svuntuaðgerðinni

Kayla Butcher hefur misst 85 kíló eftir að hún gekkst undir hjáveituaðgerð. Núna glímir hún við nokkuð þekkt vandamál, en hún er með gríðarlegt magn af aukahúð sem hún þarf að fara í aðgerð til að losna við.

Aðgerðin kostar 20.000 dollara eða því sem samsvarar 2,3 milljónum íslenskra króna.

Hún hefur greint frá ferlinu ítarlega á Instagram-síðunni sinni og er með ólíkindum að sjá breytinguna á Butcher.

Kayla byrjaði ung að borða mjög óhollan mat og þá aðallega skyndibita og sæta gosdrykki.

Þegar hún var 14 ára var hún mjög þunglynd og þá fóru kílóin að hrannast utan á hana. Hún ákvað einn daginn að snúa við blaðinu og varð að missa nokkuð mörg kíló áður en hún fékk leyfi til að gangast undir hjáveituaðgerð. 

Kayla fór í aðgerðina í febrúar á síðasta ári og hefur síðan þá misst fjölmörg kíló en hún er búsett í Kanada og greiddu því sjúkratryggingarnar aðgerðina fyrir Butcher.

Núna safnar hún fyrir aðgerðinni til að fjarlægja aukahúð og hefur hún stofnað GoFundMe síðu til að safna.