Fjórir menn handteknir í tengslum við ránið í Kauptúni

Fjórir menn hafa verið handteknir í tengslum við vopnað rán í Kauptúni síðdegis í dag. Þeir voru handteknir í íbúð á höfuðborgarsvæðinu laust fyrir klukkan 19 í kvöld en þar fundust bæði fíkniefni og skotvopn.

Lögregla segist í tilkynningu ekki geta gefið frekari upplýsingar um málið að svo stöddu.

Mennirnir eru grunaðir um að hafa rænt mann á bílaplaninu við Costco í dag og hótað honum með byssu. Lögreglan og sérsveitin vopnuðust í framhaldinu og hófu leit að mönnunum.