Lærisveinn Guðmundar upptekinn við að bjarga lífi manns þegar hann átti að taka við verðlaunum

Guðmundur Guðmundsson þurfti í gær að gera hlé á undirbúningi sínum fyrir HM í handbolta í Frakklandi, þegar hann fékk risastór verðlaun ásamt strákunum sínum í danska handboltalandsliðinu. Ólympíugullverðlaun liðsins í Ríó var valið besta íþróttafrek ársins á Sportgala í Danmörku.

Danska landsliðið spilar við það íslenska í lokaleik Bygma-æfingamótsins en ekkert var spilað í gær þar sem allt liðið var á leiðinni á uppskeruhátíð danska íþróttaársins. Mikið var um dýrðir í Boxen i Herning þar sem íþróttahátíðin fór fram.

Gulldrengir Guðmundar, eins og danska liðið er kallað í dönskum fjölmiðlum, fóru upp á svið og tóku á móti verðlaunum Berlingske Tidende fyrir besta íþróttafrek ársins í Danmörku en þessi verðlaun hafa verið veitt frá 1930.

Handboltalandsliðið hafði betur í keppni við grindahlauparann, Söru Pedersen sem vann silfur á Ólympíuleikunum og sundkonuna Pernillu Blume en hún vann gullið í 50 metra skriðsundi í Ríó.

Einn úr hópnum, Casper Mortensen, mætti ekki til að taka þátt í verðlaunum fyrir bestu fagnaðarlæti  ársins, hann hafði brugðið sér á salernið.  BT segir frá.

Á meðan leitað var að stórskyttunni var hann að bjarga lífi manns sem hafði fengið hjartaáfall. Það var ekki fyrr en hann svaraði síma konu sinnar að sannleikurinn kom í ljós.  

Casper Mortensen gleymir þessu kvöldi í gær ekki í bráð. Sem betur fer var allt í lagi með manninn en hann fór upp á sjúkrahús í frekari rannsóknir.