Trump segist munu viðurkenna niðurstöðuna ef hann sigrar

Bandaríski forsetaframbjóðandinn Donald Trump segir að hann muni viðurkenna niðurstöðu forsetakosninganna sem fram fara þann 8. nóvember, ef hann ber sigur úr býtum.

„Ég mun viðurkenna niðurstöðuna í þessu sögulega forsetakjöri, ef ég vinn,“ sagði Trump á kosningafundi með stuðningsmönnum sínum í bænum Delaware í Ohio-ríki í dag.

Trump hefur verið harðlega gagnrýndur vegna orða sinna í kappræðum næturinnar þar sem hann neitaði að svara hvort hann muni viðurkenna niðurstöðu kosninganna.

„Ég mun taka afstöðu til þess þegar að sá tími kemur,“ sagði Trump á kosningafundinum og sakaði fjölmiðla og fleiri um að vera óheiðarlega. „En ég tel að kjósendur sjái í gegnum þetta.“