Raikkonen: Við þurfum bara að aka hröðustu keppnina

Nico Rosberg náði sínum 30. ráspól í Formúlu 1 í dag. Bilið á milli hans og Lewis Hamilton sem var 0,013 sekúndum hægari var 83 sentimetrar. Hver sagði hvað eftir tímatökuna?

„Ég er auðvitað ánægður með þetta. Á morgun snýst þetta um að láta allt smella saman og halda lífi í dekkjunum til að láta sem besta keppnisáætlun ganga upp,“ sagði Rosberg.

„Ég er áægður með tímatökuna, það er búin að fara mikil vinna í uppstillingu bílsins þessa helgi. Maður þarf ekki að vera á ráspól til að vinna,“ sagði Lewis Hamilton sem hefur síðustu tvö ár unnið eftir að hafa ræst annar í Japan.

„Það er ekki hægt að segja að bíllinn hafi náð miklum framförum frá því síðustu helgi. Þetta er raunar sami bíllinn. Við stefnum ekki beint á þriðja sætið en þetta er betra en að vera aftar. Ég veit ekki hvort við getum unnið á morgun, við þurfum bara að ná góðri ræsingu og aka hröðustu keppnina frá ræsingu til loka,“ sagði Kimi Raikkonen eftir tímatökuna.

„Ég er mátulega ánægður með þessa tímatöku, við erum ekkert svo langt á eftir Ferrari. En ég held að við höfum verið að tapa tíma í hægu beygjunum. Það er ekki svo auðvelt að taka fram úr hérna. Slagurinn við Ferrari á morgun mun væntanlega snúast um keppnisáætlunina,“ sagði Max Verstappen sem ræsir fjórði á morgun á Red Bull bílnum.

„Það er pínu pirrandi að hafa ekki náð að skáka Ferrari en auðvitað færumst við upp vegna þess að Sebastian [Vettel] þarf að taka út refsingu. Ég held að Mercedes verði ekki langt á undan á morgun,“ sagði Daniel Ricciardo sem ræsir fimmti á morgun eftir að hafa endað sjötti í dag.

Sebastian Vettel á Ferrari er að taka út þriggja sæta refsingu. Honum var refsað fyrir að hafa valdið áreksri í fyrstu beygju í Malasíu síðustu helgi. Vettel ræsir sjöundi á morgun.

„Kimi stóð sig betur en ég í dag. Það er samt ekki annað hægt en að vera ánægður með dag eins og í dag á svona erfiðri braut. Við erum ekki langt á eftir Mercedes,“ sagði Vettel.