Hlutabréfahrun hjá Samsung

Gengi hlutabréfa í suður-kóreska tæknifyrirtækinu Samsung hríðféll í nótt um 6,98 prósent. Ástæðu þess má rekja til vandamála ve3gna nýjasta flaggskips fyrirtækisins á símamarkaði, Galaxy Note 7.

Eins og Vísir greindi frá hefur verið ákveðið að stöðva sölu á símanum vegna þess að fréttir hafa borist frá Bandaríkjunum og Suður-Kóreu að síminn hafi sprungið á meðan á hleðslu stendur eða að henni lokinni.

Á dögunum vöruðu svo bandarísk yfirvöld eigendur símans við því að kveikja á eða hlaða símann sinn um borð í flugvél í háloftunum. Flugmálayfirvöld hafa einnig varað við því að pakka símanum niður í farangur.

Vika er síðan fregnir af sprengingum bárust en forsvarsmenn Samsung sögðu þá að það myndi taka tvær vikur fyrir fyrirtækið að komast yfir vandamálið.

Galaxy Note 7 var settur á markað þann 19. ágúst síðastliðinn en alls hafa selst um 2,5 milljón eintaka.