Guðmundur: Tár á hvarmi þegar silfrið er rifjað upp

Tveir leikir búnir og tveir sannfærandi sigrar í húsi. Danska handboltalandsliðið lítur vel út í upphafi Ólympíuleikanna. Frábær vörn, góð hraðaupphlaup og léttleikandi sóknarleikur. Það er allt til alls í liðinu að þessu sinni og við stjórnvölinn er síðan maður hefur sem hefur upplifað allt þegar kemur að Ólympíuleikum.

Hann fór á sína fyrstu Ólympíuleika sem leikmaður fyrir 32 árum og er nú á fjórðu leikunum í röð sem þjálfari. Guðmundur Guðmundsson brosti sínu breiðasta þegar undirritaður hitti á hann eftir flottan sigur á Túnismönnum. Það eru örugglega ekki allir sem líður nánast eins og á heimavelli þegar þeir eru komnir á Ólympíuleika.

Átti ekki von á þessu

„Þetta er stórkostlegt en ég átti ekkert von á þessu,“ segir Guðmundur um þá staðreynd að hann er mættur á sína sjöttu Ólympíuleika.

„Ég átti ekki von á því að taka við íslenska landsliðinu aftur eftir Ólympíuleikana 2004. Svo var mér falið þetta verkefni að taka við íslenska liðinu og koma því á Ólympíuleikana 2008, sem var mikill heiður fyrir mig. Það var fyrsta verkefnið mitt og það tókst og þá var ég kominn inn á Ólympíuleika aftur. Svo náttúrulega 2012 og svo er ég lentur hér aftur,“ segir Guðmundur.

Að þessu sinni fór hann á setn­ingarhátíð leikanna sem hluti af danska Ólympíuhópnum. „Það var svolítið skrýtið að labba inn með danska liðinu á setningarhátíðinni en auðvitað er það bara rosalegur heiður. Það var virkilegur heiður og bara gleði í mínu hjarta. Það er frábært að fá að leiða þetta danska lið inn á Ólympíuleika enda er það stórkostlegt verkefni. Þetta er auðvitað mjög krefjandi líka,“ segir Guðmundur.

Tvöfalt oftar á ÓL en Danir

Guðmundur hefur farið tvöfalt oftar en danska liðið á Ólympíuleika frá og með leikunum í Seoul og undanfarna tvenna leika hafa Danir ekki komist hærra en í 6. (2012) og 7. sæti (2008). Íslenska landsliðið, undir stjórn Guðmundar, var því ofar en danska liðið á hvorum tveggja leikunum.

„Þeir hafa ekki spilað um verðlaun og ég held að þeir hafi aldrei komist í gegnum átta liða úrslitin. Það eru stórir möguleikar ef allt fer vel hjá okkur,“ segir hann.

Guðmundur fór tvisvar sem leikmaður á Ólympíuleika á níunda áratugnum og hefur tekið þátt í fimm af sjö skiptum sem íslenska handboltalandsliðið hefur verið á Ólympíuleikum. Hann var of ungur á ÓL í München 1972 og nýhættur í landsliðinu á ÓL í Barcelona 1992.

„Ég er búinn að tala um mína reynslu sem leikmaður af Ólympíuleikum og hef miðlað henni. Ég veit það bæði sem leikmaður og svo sem þjálfari nú þegar ég er að fara á mína fjórðu Ólympíuleika í röð. Auðvitað lærir maður af reynslunni og kannski hefur maður einhvern tíma á leiðinni gert mistök og lært af þeim. Svo hefur maður gert góða hluti og lært af þeim líka. Svo reynir maður að nýta þetta allt saman fyrir þetta lið.“

Hann fór með íslenska landsliðið á þrenna leika í röð og upplifði mjög mismunandi hluti. „Þetta var ekki nógu gott í Aþenu. Við vorum með stórkostlegt lið í London og unnum alla leikina í riðlinum. Við vorum í fyrsta sæti og svo fórum við í þennan leik á móti Ungverjum í átta liða úrslitunum sem endaði sem martröð. Það var bara hræðilegt,“ segir Guðmundur en leikarnir í Peking 2008 standa að sjálfsögðu upp úr. Þar tókst honum að koma íslenska landsliðinu alla leið í úrslitaleikinn.

Ekki hægt að lýsa með orðum

„Það er eiginlega ekki hægt að lýsa leikunum í Peking með orðum. Maður nánast fær tár á hvarm þegar maður hugsar um það. Maður verður bara klökkur. Það er bara svo margt í því eins og hvernig við gerðum þetta. Því gleymi ég aldrei,“ segir Guðmundur. Sem leikmaður fór hann líka á ólíka leika.

„Það var stórkostlegt í Los Ang­eles 1984 þegar við urðum í sjötta sæti upp úr engu. Svo vorum við í mjög erfiðum riðli í Seoul. Þá vorum við svo góðir fyrir Ólympíuleikana og þá fóru allir að tala um Ólympíugull. Svona er þetta bara. Ég er búinn að prófa allt og er yfirvegaður og rólegur yfir þessu,“ sagði Guðmundur.

„Það er rosalega mikilvægt að halda einbeitingunni og ég er alltaf að tala um það við þá. Að halda einbeitingunni á næsta verkefni en ekki eitthvað annað. Við erum mjög faglegir með því hvernig við erum. Við förum alltaf saman í morgunmat og hádegismat og höldum hópnum saman eins vel og við getum. Við borðum saman af því að þetta eru svo margir,“ segir Guðmundur og hann hrósar dönsku strákunum.

Öðruvísi týpur

„Þeir eru mjög faglegir og koma mjög vel inn í þetta. Þeir leggja á sig aukavinnu til þess að skoða vídeó. Það er virkilega gaman að vinna með þá. Þetta eru allt öðruvísi týpur en íslensku strákarnir en það var stórkostlegt að vinna með Íslendingunum líka. Ég er svo þakklátur fyrir að hafa fengið tækifærið til þess að þjálfa Ísland. Þetta er bara öðruvísi,“ segir Guðmundur.