Einn Rússi fær að taka þátt í frjálsíþróttakeppninni

Það er nú orðið ljóst að einn rússneskur íþróttamaður verður með í frjálsíþróttakeppni Ólympíuleikanna þó svo alþjóða frjálsíþróttasambandið hafi sett alla rússneska frjálsíþróttamenn í bann frá leikunum.

Það er langstökkvarinn Darya Klishina sem hefur fengið leyfi til þess að keppa. Hún áfrýjaði banninu til íþróttadómstólsins í Sviss og það bar árangur.

Aðstæður hennar eru aðrar en hjá löndum hennar. Hún hefur nefnilega verið að gangast undir lyfjapróf í Bandaríkjunum og ku ekki hafa komið nálægt skipulagða svindlinu í heimalandinu.

Hin 25 ára gamla Klishina varð í tíunda sæti á HM á síðasta ári.