Hamilton: Ræsingin var lykillinn að þessu

Lewis Hamilton er nú sá sigursælasti í ungverska kappakstrinum frá upphafi. Hann er sá eini sem hefur unnið þar fimm sinnum. Hver sagði hvað eftir keppnina?

„Ræsingin var lykillinn að þessu. Keppnisáætlunin gekk upp. Það var á köflum erfitt að komast í gegnum þá sem við vorum að hringa,“ sagði Hamilton á verðlaunapallinum.

„Fyrsta beygjan var það sem kostaði mig öll stigin í dag. Ég reyndi allt til að setja pressu á Lewis en það er ekki auðvelt að taka fram úr hér. Það hljómar ekki illa að svara fyrir sig næstu helgi á heimavelli og taka aftur forystuna,“ sagði Nico Rosberg á verðlaunapallinum. Hann vísaði þar til þess að næsta keppni fer fram næstu helgi í Þýskalandi.

„Það er frábært að komast á verðlaunapall aftur í ár. Ég var ekki kátur með síaðsta verðlaunapall en þessum get ég fagnað,“ sagði Daniel Ricciardo á verðlaunapallinum.

Þrír fremstu menn dagsins eru einmitt í sömu sætum í heimsmeistarakeppni ökumanna eftir keppnina í dag.

„Þetta var erfitt frá upphafi til enda. Þetta var hrikalega góð keppni fyrir liðið í dag,“ sagði Niki Lauda sérstakur ráðgjafi Mercedes liðsins og fyrrum heimsmeistari í Formúlu 1.

„Fyrir mér var ekkert að baráttunni okkar Kimi [Raikkonen]. Ég býst ekki við því að verða refsað fyrir baráttuna,“ sagði Max Verstappen sem varð fimmti á Red Bull bílnum.

„Það er ekki mitt að ákveða hvort Verstappen verði refsað. Ég var að reyna allt sem ég gat. Bíllinn var góður í dag,“ sagði Kimi Raikkonen sem varð sjötti eftir harða baráttu við Verstappen.

„Þetta var góð keppni. Kimi kvartaði aðeins en ég sé ekkert að þessu. Við erum búnir að vera fljótari en Ferrari undanfarið. Báðir ökumenn okkar gerðu sitt besta í dag. Við áttum ekki möguleika á að stríða Mercedes en við gerðum allt rétt í dag,“ sagði Christian Horner keppnisstjóri Red Bull.

„Í hita leiksins finnst manni alltaf eins og maður sé að stórtapa á að hringa bíla. Þeir stóðu sig vel í að hleypa okkur fram úr þrátt fyrir að við værum að nálgast hratt. Ég lét kannski út úr mér full harkaleg ummæli vegna þeirra í keppninni,“ sagði Sebastian Vettel sem varð fjórði á Ferrari bílnum. Hann var duglegur að kvarta yfir því í keppninni að fá ekki auðveldan framúrakstur fram úr hægfara bílum.