Ricciardo: Ég vissi að við ættum að geta þetta

Daniel Ricciardo á Red Bull náði í sinn fyrsta ráspól í dag. Hann var fljótastur í tímatökunni í Mónakó, sem er ein sú mikilvægasta á keppnisdagatalinu. Hver sagði hvað eftir tímatökuna?

„Ég vissi að við ættum að geta þetta. Ég fann það líka í Barselóna að ég átti meira inni svo ég hafði mikla trú á því að ég ætti að geta náð góðum árangri hér,“ sagði Ricciardo eftir tímatökuna.

Ricciardo mun ræsa á ofur mjúkum dekkjum og ætti því að geta keyrt lengra inn í keppnina á morgun en Mercedes til að mynda, áður en hann tekur þjónustuhlé. Mercedes mun hefja keppnina á últra-mjúkum dekkjum.

„Daniel var bara snöggur í dag og náði í verðskuldaðan ráspól. Ég var bara ekki nógu snöggur í dag,“ sagði Nico Rosberg á Mercedes eftir tímatökuna.

„Þetta var erfið tímataka, ég náði þrátt fyrir vélavandræðin að setja góðan hring. Það er betra en ég hef átt að venjast í ár. Annars veit ég ekki hvað ég á að segja í augnablikinu,“ sagði Lewis Hamilton á Mercedes eftir tímatökuna.

„Frábært hjá Daniel. Hann er heillandi og klár ökumaður. Ef Daniel nær góðri ræsingu getur hann unnið keppnina,“ sagði Jackie Stewart fyrrum heimsmeistari í Formúlu 1.

„Þetta var um það bil það sem við bjuggumst við. Við náðum að komast nálægt veggjunum og reyndum að finna hvert sekúndubrot eins og maður vill gera í tímatökunni hér,“ sagði Marcus Ericsson sem ræsir 17. á morgun á Sauber bílnum.

„Þetta gekk áægtlega, við hefðum auðvitað viljað ná báðum bílum í í þriðju lotu. Okkur langar alltaf í meira. Við erum á hraðri leið aftur á toppinn en hún er aldrei nógu hröð,“ sagði Jonathan Neale verkefnastjóri McLaren.

„Þetta gengur vel, hefði getað farið aðeins betur en allt í góðu,“ sagði Guenther Steiner, liðsstjóri Haas.

„Það er alltaf gaman hérna, ég saknaði þess að aka hérna ég var eins og barn á jólunum með nýtt dót þegar ég kom aftur hingað,“ sagði Esteban Gutierrez sem ræsir 12. á morgun í Haas bílnum.

„Tímatakan byrjaði vel en endaði ekki vel. Við áttum erfitt með að finna gripið sem var þarna einhverstaðar. Við hefðum átt að gera betur. Við erum nær Mercedes en við lítum út fyrir í dag. Við náðum ekki að bæta í þegar aðrir gerðu það þegar leið á tímatökuna,“ sagði Sebastian Vettel sem ræsir fjórði á morgun á Ferrari bílnum.

Bein útsending frá keppninni hefst klukkan 11:30 á morgun á Stöð 2 Sport.