Langstærsta tap Vals í úrslitakeppni frá upphafi

Valsmenn fengu skell þegar þeir mættu Aftureldingu í fjórða leik liðanna í undanúrslitum Olís-deildar karla í N1-höllinni í Mosfellsbæ í gær.

Valur vann þriðja leikinn örugglega og gat tryggt sér sæti í úrslitum með sigri í gær. Þeir voru hins vegar aldrei nálægt því. Afturelding hafði mikla yfirburði í leiknum og í hálfleik munaði níu mörkum á liðunum, 15-6.

Mosfellingar gáfu hvergi eftir í seinni hálfleik og unnu að lokum 13 marka sigur, 29-16. Ótrúlegar tölur, sérstaklega í ljósi yfirburðanna sem Valur hafði í þriðja leiknum þar sem liðið náði mest 10 marka forskoti, 18-8.

Sveiflan frá 29. mínútu í leik þrjú, þegar Sturla Magnússon kom Val í 18-8, og þar til Afturelding náði fyrst 13 marka forskoti á 50. mínútu í leiknum í gær telur því 23 mörk.

Sjá einnig: Óskar Bjarni: Jafnmikil skita í þjálfarateyminu og hjá leikmönnum

Það sem gerir þessar sveiflur enn skrítnari er hversu jafnir fyrstu tveir leikirnir í einvíginu voru en Afturelding vann fyrsta leikinn með þremur mörkum, 22-25, og Valsmenn annan leikinn einnig með þremur mörkum, 23-26.

Tapið hjá Val í gær er sögulegt en þetta er langstærsta tap liðsins í úrslitakeppninni frá upphafi, eða frá því núverandi fyrirkomulag var tekið upp árið 1992.

Áður hafði Valur mest tapað með átta mörkum, fyrir Haukum í fjórða leiknum í lokaúrslitum 2009 og í fyrsta leiknum í undanúrslitum í fyrra.

Valsmenn fá tækifæri til að bæta fyrir tapið stóra á þriðjudaginn þegar þeir mæta Aftureldingu í oddaleik um sæti í lokaúrslitum í Valshöllinni. Þeir verða hins vegar að spila miklu mun betur en í gær ætli þeir sér að komast í úrslitaeinvígið.

Stærstu töp Vals í úrslitakeppninni:

-13 Afturelding 29-16 Valur, leikur 4 í undanúrslitum 2016

-8 Valur 24-32 Haukar, leikur 1 í undanúrslitum 2015

-8 Valur 25-33 Haukar, leikur 4 í úrslitum 2009

-7 FH 33-26 Valur, leikur 2 í úrslitum 1993

-7 Haukar 26-19 Valur, leikur 1 í undanúrslitum 2001

-7 Valur 22-29 Haukar, leikur 3 í úrslitum 2015