Passar í Hagaskóla-buxurnar

„Þetta er mjög spennandi og gaman að fá þetta tækifæri núna,“ segir markvörðurinn Hreiðar Levý Guðmundsson en hann er á förum frá Akureyri í sumar og heldur aftur til Noregs. Hann er búinn að semja við úrvalsdeildarfélagið Halden Topphåndball sem varð í fimmta sæti í deildinni.

Hreiðar þekkir vel til í Noregi eftir að hafa leikið með Nøtterøy þar í landi við góðan orðstír. Hreiðar hefur einnig leikið með sænska liðinu Sävehof og þýska liðinu Emsdetten.

Setur meiri pressu á mig

Er menn koma heim á fertugsaldri er atvinnumannsferlinum venjulega lokið. Ekki í tilfelli Hreiðars sem verður 36 ára gamall seint á árinu. Halden hefur staðið fyrir söfnun á meðal stuðningsmanna félagsins til þess að fjármagna endan­lega kaupin á Hreiðari.

„Þetta er mjög sérstakt en skemmtilegt. Þetta setur líka meiri pressu á mig. Áhorfendurnir eiga í mér og því eins gott fyrir mig að standa mig,“ segir Hreiðar. Félagið reyndi að safna 1,5 milljónum króna en náði á endanum að safna um tveimur milljónum. „Þetta eru peningar upp í samninginn og býr líka til stemningu.“

Bjóða syninum út

Hreiðar segir að hann hafi verið búinn að gefa frá sér þetta dæmi enda þarf hann að skilja ungan son sinn eftir á Akureyri. Norska félagið hafi aftur á móti komið til móts við hann.

„Það er erfitt að fara frá stráknum mínum en félagið er búið að skipuleggja að ég fái lengri frí heima og hvenær hann geti komið út. Félagið ætlar að bjóða honum með í æfingamót sem VIP-gesti. Þeir hafa komið mjög skemmtilega til móts við mig og það hjálpaði til við að ég sagði já á endanum.“

Markvörðurinn hávaxni viðurkennir að atvinnumannsdraumar hafi verið úti er hann kom heim.

„Þetta ár snerist eiginlega bara um að koma til baka eftir meiðsli. Að sjá að ég gæti þetta enn. Það voru engar framtíðaráætlanir og útlönd alls ekki inni í myndinni. Ég ætlaði að reyna að eiga nokkur góð ár hér á Íslandi áður en ég hætti. Mér finnst ég eiga nóg eftir núna og vonandi eru bara bestu árin eftir.“

Hef ekki verið í betra formi í 20 ár

Það er eftir því tekið í hversu góðu líkamlegu formi Hreiðar er þessa dagana. Hann hefur í raun aldrei litið betur út og viðurkennir það fúslega sjálfur. Hann breytti um lífsstíl.

„Ég hef ekki verið í betra formi í 20 ár. Ég er farinn að passa aftur í gömlu Hagaskóla-buxurnar,“ segir Hreiðar Levý léttur. „Helsta breytingin hjá mér er mataræðið. Ég hef verið að borða vitlaust í gegnum tíðina. Ég er hættur að borða pasta og brauð. Í staðinn er komið meira kjöt og prótein. Ég hef auðvitað verið að æfa vel í öll þessi ár en eftir að matar­æðið var orðið gott þá kvaddi ég loksins þriggja tölu klúbbinn,“ segir Hreiðar en hvað er hann búinn að skafa mikið af sér?

„Ég er kominn niður um rúm 20 kíló frá því síðasta sumar. Ég var þyngstur 118 kíló en er 96 í dag. Þegar ég var í atvinnumennskunni og í landsliðinu var ég um 105 kíló. Þá fannst mér ég vera í fínu standi og auðvitað sé ég aðeins eftir því að hafa ekki verið í sama forminu þá og núna. Mig vantaði meiri leiðsögn í matarmálunum en þau skipta öllu máli. Ég er að kaupa mér nýtt líf með þessu og tel að ég eigi mikið inni ef ég hugsa vel um mig áfram.“

 

Enn með hugann við landsliðið

Hreiðar er mjög jákvæður og segist enn vera að elta stóra drauma á ferli sínum.

„Ég vil elta mína stóru drauma. Einn af þeim er að komast aftur í íslenska landsliðsbúninginn og spila aftur fyrir Ísland. Svo vil ég spila vel og reyna að halda heilsu. Vera sáttur við sjálfan mig og sjá hvert það leiðir mig. Það væri gaman að toppa á síðustu árunum. Af hverju ekki, segi ég?“

Meiðsli hafa farið illa með Hreiðar síðustu ár og hann hefur þurft að fara í aðgerð á báðum hnjám. Hann var skorinn upp síðustu tvö sumur. Svo lenti hann í meiðslum á hásin í kringum áramótin sem eru enn að plaga hann.

„Ég byrjaði ekki að æfa fyrr en í september og var í raun byrjaður að spila áður en ég gat hlaupið. Þessi hásinarmeiðsli voru mjög svekkjandi því ég var kominn vel í gang og að keppa um landsliðssætið. Hásinar­meiðslin eru enn aðeins að plaga mig,“ segir Hreiðar Levý sem lítur mjög björtum augum á framtíðina. „Ég ætla að klára þetta tímabil með stæl hjá Akureyri og svo verður ekkert farið til Benidorm í ár. Bara æft af krafti og komið inn í flottu formi í Noregi.“