Gunnar Heiðar: Verið algjör steik í gangi hjá ÍBV

Gunnar Heiðar Þorvaldsson dró ekkert undan þegar hann ræddi síðasta tímabil hjá sínum mönnum í ÍBV í viðtali í Akraborginni á X977 í gær.

Fyrrverandi landsliðsframherjinn sneri aftur til Eyja eftir ellefu ár í atvinnumennsku um mitt síðasta sumar og hjálpaði til við að halda uppeldisfélaginu í efstu deild með fjórum mörkum í ellefu leikjum.

Gunnar Heiðar var vægast sagt ósáttur við það sem var í gangi hjá Eyjaliðinu í fyrra og talaði hreint út um ÍBV sem var enn eitt árið í fallbaráttu.

„Þegar ég kom síðasta sumar til að hjálpa liðinu mínu að halda sér uppi í þessari deild þá hafði ég aldrei upplifað eins karakterlaust ÍBV-lið á ævinni. Ég trúði ekki að þetta væri satt,“ sagði Gunnar Heiðar.

„Það var eflaust ýmislegt sem spilaði inn í eins og þjálfaramálin og það að alltaf eru nýir leikmenn að koma inn á hverju ári og enginn stöðugleiki er í þessu hjá okkur.“

Menn þurfa að hugsa sinn gang

Eyjamenn settu þriggja ára áætlun í gang með ráðningu Jóhannesar Harðarsonar fyrir síðustu leiktíð en liðið lenti svo í erfiðleikum þegar þjálfarinn þurfti að stíga til hliðar snemma sumars.

„Þó alltaf sé verið að reyna að byggja upp fyrir framtíðina og næstu þrjú árin þá er liðið búið að vera með þrjá þjálfara á þremur árum. Það er búin að vera algjör steik í gangi þannig lagað séð,“ sagði Gunnar Heiðar.

„Ég stóð upp og sagði þetta á æfingu í vetur og ég vona bara að menn hugsi sinn gang og leggi allt í þetta því við verðum að gera þetta allir saman ef við ætlum að gera eitthvað. Menn voru sammála þessu sem var bara frábært,“ sagði Gunnar Heiðar.

Framherjinn sér fram á bjartari tíma með Eyjaliðinu sem hefur spilað vel á fyrstu vikum nýs árs og fagnaði á mánudaginn sigri í Fótbolta.net-mótinu eftir að leggja KR í úrslitaleik.

„Andrúmsloftið í búningsklefanum er orðið miklu betra og það er meira tempó á æfingum. Menn eru að gera þetta saman þannig ÍBV-liðið er að líkjast því sem ég þekkti í gamla daga. Maður er búinn að vera lengi í þessu og veit alveg hvað þarf að gera til að ná árangri,“ sagði Gunnar Heiðar.

„Við erum með flotta peyja í liðinu og mér finnst núna að við séum með karaktera til að geta stigið upp og tekið vonandi þetta næsta skref upp á við. Það er klárlega markmiðið hjá okkur í ár að taka þetta næsta skref og komast ofar í töflunni.“

Viljum taka næsta skref

Gunnar Heiðar telur alveg mögulegt fyrir ÍBV að vinna titla eins og hann sagðist stefna að með Eyjamönnum þegar hann skrifaði undir síðasta sumar. Hann bendir á sitt gamla félag í Svíþjóð sem gott dæmi um að allt sé mögulegt í fótboltanum.

„Það er allt hægt. Ég var að horfa upp á vini mína í Norrköping vinna sænsku úrvalsdeildina í fyrra og þeir eru með miklu minni pening á milli handanna heldur en stóru liðin,“ sagði hann.

„Ég er ekki að segja að við eigum að berjast við toppinn eða setja pressu á okkur, en nú er þessi þriggja ára áætlun loksins í gangi og við erum að fara að búa til meistaralið hérna. Hvort sem það gerist á næsta tímabili, þar næsta eða eftir þrjú ár,“ sagði Gunnar Heiðar Þorvaldsson.

Allt viðtalið má heyra í spilaranum hér að neðan. Það hefst eftir 40 mínútur og 30 sekúndur.