Hill: Rosberg verður sterkari í ár

Damon Hill, fyrrum heimsmeistari í Formúlu 1 telur að vonbrigði Nico Rosberg með annað sæti í heimsmeistarakeppni ökumanna síðustu tvö ár muni efla hann í baráttunni við ríkjandi heimsmeistara, Lewis Hamilton.

Rosberg hefur undanfarin tvö ár þurft að sætta sig við annað sæti í heimsmeistarakeppni ökumanna. Hamilton, sem er liðsfélagi Rosberg hjá Mercedes, hefur í bæði skiptin orðið heimsmeistari.

Hill þekkir sporin sem Rosberg stendur í vel af eigin reynslu. Þegar Hill ók fyrir Williams liðið tapaði hann titlinum til Michael Schumacher árin 1994 og 1995. Schumacher ók þá fyrir Benetton liðið. Hill varð svo heimsmeistari árið 1996. Hill hefur trú á að Rosberg hafi það sem til þarf til að snúa blaðinu við.

„Ég held að Rosberg sé ákveðnari en áður,“ sagði Hill í samtali við Sky Sports. Hill er eini sonur heimsmeistara í Formúlu 1 sem hefur tekist að verða heimsmeistari líka, Graham Hill, faðir Damon varð tvisvar heimsmeistari árin 1962 og 1968. Rosberg myndi bæta sér og föður sínum í þeirra félagsskap, takist honum að næla í titilinn. Keke Rosberg, faðir Nico varð heimsmeistari ökumanna 1982.

„Ég held að við tapið í Austin, þegar hann tapaði möguleikanum á að berjast um titilinn við Lewis (Hamilton) og kastaði derhúfunni í hann eins og frægt er orðið, hafi orðið kúvending. Ég held að Nico hafi sagt við sjálfan sig, jæja, ég ætla ekki að taka þessu þegjandi lengur, enda vann hann allar þær keppnir sem eftir voru,“ sagði Hill.

„Hann getur alveg orðið annar maðurinn til að búa til heimsmeistara-feðga með því að verða heimsmeistari sjálfur. Hann veit að sennilega er tíminn að skornum skammti og kannski verður hann því ákveðnari í að tryggja sér titilinn og erfiðari að halda aftur af,“ sagði Hill að lokum.