Sören Frederiksen seldur frá KR til Viborg

KR er búið að samþykkja kauptilboð danska úrvalsdeildarliðsins Viborg í danska framherjann Sören Frederiksen, en þetta kemur fram á heimasíðu KR.

Sören kom til KR frá Álaborg fyrir síðustu leiktíð og skoraði fimm mörk í 24 deildar- og bikarleikjum fyrir Vesturbæjarliðið.

„KR þakkar Sören fyrir sitt framlag til félagsins og óskar honum velfarnaðar á nýjum slóðum,“ segir í frétt á heimasíðu KR-inga.

Daninn er sjötti leikmaðurinn sem yfirgefur KR frá síðustu leiktíð, en á móti er liðið búið að fá Indriða Sigurðsson, Finn Orra Margeirsson og Michael Præst.