Óli Stef: Þurfum að koma okkur aftur upp í fjögur efstu sætin

Ólafur Stefánsson, annar aðstoðarþjálfara íslenska handboltalandsliðsins, segir að íslenska landsliðið eiga alltaf að hafa háleit markmið og liðið eigi að stefna að koma sér aftur upp í efstu fjögur sætin.

„Æfingarnar eru búnar að vera mjög góðar. Fyrsti leikurinn á móti Portúgölum var ekki góður og blikkandi ljós þar, en æfingarnar fínar," sagði Ólafur í samtali við Guðjón Guðmundsson í kvöldfréttum Stöðvar 2.

„Menn eru stemmdir og menn eru að leggja sig fram. Það þarf að skoða ýmsa hluti, en við sjáum þetta vel eftir Þjóðverjaleikina hvernig við stöndum."

Marga Íslendinga dreymir að Ísland tryggi sér sæti í forkeppni Ólympíuleikana sem fara fram í Ríó í sumar, en til þess þarf margt að ganga upp.

„Mér finnst að íslenska handboltalandsliðið eigi að hafa háleit markmið alltaf. Við eigum ekki að detta í einhverja meðalmennsku. Við þurfum að koma okkur aftur upp í fjögur efstu liðin og að minnsta kosti efstu átta og vera alltaf þar."

„Það er krafa og það er mjög gerlegt að ná í þessu tvo opnu sæti sem eru enn opin í forkeppni Ólympíuleikana."

Einhverjir spekingar hafa fullyrt að landsliðið sé orðið of gamalt. Ólafur gefur lítið fyrir þær fullyrðingar.

„Eins og ég sagði fyrir ári eða eitthvað þá eiga þeir ekki að vera sammála því og sýna að það er ekki rétt. Það er ekki mitt að dæma, fyrr en kannski eftir þetta mót."

Allt innslag Guðjóns má sjá í glugganum hér að neðan.