Ólafía Þórunn: Aðalmarkmiðið að halda keppnisréttinum

Ólafía Þórunn Kristinsdóttir braut blað í íslenskri golfsögu í desember en hún varð önnur íslenska golfkonan til þess að tryggja sér þátttökurétt á Evrópumótaröðinni.

Hún fetar þar með í fótspor Ólöfu Maríu Jónsdóttur sem lék á mótaröðinni frá 2005 til 2007 en Ólafía var í viðtali við Hjört Hjartar í Akraborginni á dögunum um hvað tekur við næst.

Þar talar hún meðal annars um væntingarnar fyrir komandi keppnistímabil á mótaröðinni og framtíðarmarkmið sín sem atvinnumanneskja í golfinu.

„Ég vonast til þess að læra sem mest á fyrsta árinu, maður verður að passa væntingarnar í fyrstu því þær geta haft áhrif á mann. Aðalmarkmiðið verður að halda keppnisréttinum.“

Ólafía segir einnig að draumurinn sé að komast á bandarísku LPGA mótaröðina þar sem bestu golfkonur heims spila.

„Þar er maður komin meðal þeirra bestu og verðlaunaféð er hærra. Mig dreymir um að vera meðal þeirra og jafnvel vinna eitt af þessum mótum.“

Fyrsta mót Ólafíu á Evrópumótaröðinni er um miðjan febrúar en það fer fram í Nýja Sjálandi. Þaðan fer mótaröðin til Ástralíu og svo Kína en næsta sumar munu flest mótin verða spiluð í Evrópu.

Eitt er víst að árið verður spennandi hjá Ólafíu en mótaskránna á Evrópumótaröðinni má sjá hér.