Ótrúlegar vinsældir Conors í Vegas

Stjarna UFC-kvöldsins á laugardag er Írinn Conor McGregor en hann hefur þotið upp á stjörnuhimininn á methraða. Hann er söluvænn fyrir UFC enda óspar á yfirlýsingarnar sem hann hefur hingað til staðið undir.

Hann hefur æft gríðarlega vel síðustu vikur og hefur einnig þurft að standa í viðtölum og myndatökum í allt að fimm tíma á dag síðustu daga. Ágangur fjölmiðla er mikill og fá færri viðtal en vilja. Það vilja allir tala við hann. Mikið álag en einbeitingin er í lagi tjáði þjálfari hans, John Kavanagh, íþróttadeild í gær.

Nokkuð hefur verið skrifað um að hann þurfi að létta sig óvenju mikið fyrir bardagann en Kavanagh sagði það ekki vera satt. Vildi ekki staðfesta hvað hann þyrfti að létta sig mikið en sagði að það væri lítið mál að ná réttri tölu fyrir vigtun á morgun.