Alls ekkert sem þarf að óttast á Álfahátíðinni í dag

„Þetta er ekkert spúkí og alls ekki nauðsynlegt að trúa á álfa, bara að hafa gaman af fallegri tónlist,“ segir Inga Björk Ingadóttir músíkmeðferðarfræðingur sem leikur á lýru og syngur á Litlu-Álfahátíðinni sem fram fer í Álfagarðinum í Hafnarfirði í dag.

„Hátíðin hefur verið haldin árlega síðan árið 2011 og er í Hellisgerði, sem er í hjarta bæjarins, svona sannkölluð náttúruperla í miðjum bænum,“ útskýrir Inga.

Hátíðin er haldin á sumarsólstöðum, en það er alls ekki fyrir tilviljun. „Það er svo mikil orka og kraftur sem fylgir þessum tíma ársins sem opnar fyrir vináttutengsl milli álfa, huldufólks og manna,“ bendir Inga lauflétt á.

„Hátíðin í ár hefur einnig sína sérstöðu, en í ár koma bara konur að tónlistarflutningi, en það er tileinkað hundrað ára kosningaafmæli kvenna.“

Fram koma auk Ingu, Terra Tirapelli sem leikur á indíánaflautu, Elaine Ní Cuana leikur á írska sekkjapípu og Bergljót Arnalds sem flytur tónlist, þar sem hún notar meðal annars eigin hjartslátt til undirspils. Ragnhildur Jónsdóttir sjáandi mun halda erindi um álfana og náttúruverurnar á svæðinu.

Inga segir hátíðina henta allri fjölskyldunni, enda standi herlegheitin yfir frá klukkan tvö til fjögur, og geti fólk bara kíkt við hvenær sem er á því tímabili.

„Það er nefnilega svo merkilegt að fá að spila úti undir berum himni, það verður allt öðruvísi en að gera það inni. Ég er nýr Hafnfirðingur svo ég er algjörlega heilluð af Hellisgerði og er því mjög spennt fyrir að fá að leika á hátíðinni,“ segir Inga og skýtur að, að það séu sannarlega forréttindi að fá að spila í Álfagarðinum, og á sama tíma forréttindi að fá að hlýða á þessa óvenjulegu tóna. Hefst hátíðin fyrir framan álfakirkjuna við gosbrunninn með tónlist og álfabæn sjálfrar Tamínu álfkonu.