Tyggjótattú fylgir hverri plötu

„Mér fannst mjög mikilvægt að það fylgdi tattoo með plötunni. Ég sagði það við þau í Mengi og þau redduðu því bara,“ segir Steinunn Harðardóttir, betur þekkt sem dj. flugvél og geimskip.

Platan heitir Nótt á hafsbotni, og er ósjálfstætt framhald af fyrri plötu hennar, Glamúr í geimnum, sem fjallaði um geiminn og óravíddir hans. „Nýja platan fjallar um það sem margir segja að sé andstæða geimsins, hafsbotninn. Ég held að fólk viti mun meira um til dæmis tunglið en hafsbotninn. Ég fattaði allt í einu hvað þetta er líkt, til dæmis er jafn mikið myrkur á hafsbotninum og í geimnum.

Svo lýsa stjörnurnar geiminn upp alveg eins og á hafsbotni eru fiskar sem lýsa,“ segir hún. Á nýju plötunni eru tólf lög, ásamt forspili og eftirspili. „Ég þurfti að ákveða nöfn á helming laganna fyrirfram, og svo valdi ég bara hvaða lög pössuðu við hvaða nafn. Mér fannst líka mikilvægt að hafa intro og endi, það gefur svona tóninn fyrir það hvernig manni á eftir að líða að hlusta á plötuna.“

Hún segir plötuna hafa átt að vera með sumarslögurum, en þar sem hún var tekin í vetur breyttist það. „Ég tók hana upp í húsum ættingja minna úti í sveit. Það var svo ógeðslega kalt og dimmt og svo voru draugasögur í útvarpinu, þannig að hún varð smá drungaleg.“

Útgáfutónleikarnir verða haldnir þann 3. júní í Mengi.