Oasis-bræður þræta um One Direction

Oasis-bræðurnir Noel og Liam Gallagher hafa eldað grátt silfur í þó nokkurn tíma. Að þessu sinni varð strákasveitin One Direction tilefni til deilna þeirra á milli. Noel lét hafa eftir sér í viðtali við Rolling Stone að hann væri ekki enn búinn að ná því hvers vegna Zayn Malik ákvað að yfirgefa strákasveitina, en ástæðan sem hann gaf var að hann vildi lifa lífinu eins og venjulegur 22 ára strákur. „Hann er nú meiri hálfvitinn að hafa hætt í bandinu. Heldur hann virkilega að hann muni eiga eðlilegt líf eftir þetta?“ sagði Noel. Bróðir hans, Liam, var ekki lengi að stökkva til og verja strákasveitina og skrifaði á twitter „Hey NG, láttu þessa 1D krakka í friði! Þó það sé saxófónn á nýju plötunni þinni og þú haldir að þú sért næsta Pink Floyd. Það vita allir að þú ert bara vondi steinninn í veggnum,“ og vitnaði með þessum orðum í lagið „Another Brick in the Wall“ með Pink Floyd.