Kristín: ÍBV þarf að vera með læti á Seltjarnanesi

Í dag ræðst hvaða lið leika til úrslita um Íslandsmeistaratitil kvenna í handbolta en þá fara fram oddaleikir í báðum undanúrslitarimmum í úrslitakeppni Olísdeildar kvenna. Kristín Guðmundsdóttir, leikstjórnandi Vals, gaf álit sitt á rimmunum fyrir Fréttablaðið.

Fyrri leikur dagsins verður viðureign Fram og Stjörnunnar í Safamýri klukkan 14.00. Stjarnan knúði fram oddaleik með afar öruggum sigri í Mýrinni á fimmtudag. „Frammistaða Fram var arfaslök í þeim leik og þetta hefur verið aðeins of mikið svart og hvítt hjá þeim fyrir minn smekk,“ sagði Kristín en Valur féll úr leik í 8-liða úrslitum eftir tap gegn Stjörnunni í oddaleik.

„Framarar voru sjálfsagt með það í undirmeðvitundinni [á fimmtudagskvöldið] að þeir ættu alltaf einn leik eftir en nú er jöfn pressa á öllum. Ég vona að þetta verði jafn og spennandi leikur en ég gæti trúað því að reynsla Stjörnunnar skili sigrinum. Stjarnan er með fleiri leikmenn sem kunna að klára svona leiki.“

Deildarmeistarar Gróttu kvittuðu fyrir óvænt tap gegn ÍBV á heimavelli í þriðja leik liðanna með því að gersigra Eyjakonur í Eyjum á fimmtudag, 34-21.

„Það er erfitt að vinna Gróttu en það er hægt, sérstaklega ef að hugarfarið klikkar hjá þeim. Breiddin er svo ekki það mikil að um leið og einn leikmaður byrjar að klikka þá gæti þetta orðið erfitt fyrir þær,“ segir Kristín sem hafði það á tilfinningunni fyrir úrslitakeppnina að ÍBV færi alla leið í úrslitin.

„ÍBV þarf að mæta til leiks með mikil læti og sjálfstraustið í botni. Þá gætu þær komist á bragðið og leikurinn orðið spennandi. En ef að Grótta fær að spila sinn leik og fær bæði vörn og markvörsluna almennilega í gang þá gæti eftirleikurinn orðið auðveldur,“ segir Kristín.

Leikur Gróttu og ÍBV hefst klukkan 16.00 í dag.