Furious 7 gæti komist á sama stall og Titanic og Avatar

Kvikmyndin Furious 7 hefur nú þénað um 1,2 milljarða Bandaríkjadala um allan heim, eða um 164 milljarða íslenskra króna á aðeins nítján dögum í sýningu. Þetta er í fyrsta sinn sem kvikmynd framleidd af Universal fer yfir milljarð í tekjur og er myndin á góðri leið að fara á stall með myndunum Avatar og Titanic, sem eru þær tvær myndir kvikmyndasögunnar sem hafa þénað mest.

Myndin komst yfir milljarð í tekjur eftir aðeins 17 daga í sýningu. Vinsældir hennar ná þvert á landamæri. Í næstu viku gæti hún til að mynda orðið vinsælasta bandaríska mynd allra tíma í Kína, en kvikmyndin Transformers: Age of Extinction er sú sem nú er í efsta sæti. Stærstur hluti tekna sem fengist hafa af myndinni hefur komið utan Bandaríkjanna, en hún nýtur samt sem áður mikilla vinsælda heimafyrir.

Eins og frægt er lést leikarinn Paul Walker við tökur á myndinni og þurftu framleiðendur hennar og handritshöfundar að gera ráðstafanir svo að hægt væri að ljúka við tökur. Bræður leikarans hlupu meðal annars í skarðið í einhverjum atriðum, en handritinu var einnig breytt vegna fráfalls Walkers sem lést í bílslysi.