Spjótkastarinn sem vann verðlaun í hástökki

Það vakti athygli margra að kastarinn Örn Davíðsson hafnaði í þriðja sæti í hástökki á Meistaramóti Íslands í frjálsíþróttum innanhúss í Kaplakrika um síðustu helgi. Örn, sem er fyrst og fremst spjótkastari, stökk yfir 1,91 metra sem dugði honum til að vinna bronsverðlaun á eftir Einari Daða Lárussyni og hinum stórefnilega Styrmi Dan Steinunnarsyni.

„Ég vann þessa grein nokkrum sinnum þegar ég var yngri en þá var ég töluvert léttari og fimari en ég er í dag,“ sagði Örn í samtali við Fréttablaðið um árangurinn. „Ég ákvað bara að prófa og sjá hvort ég kynni þetta enn. Það kom mér skemmtilega á óvart að sjá hversu hátt ég náði að stökkva.“

Örn byrjaði í 1,70 m og vann sig upp hægt og rólega út frá því. Hann hafði ekkert æft hástökkið sérstaklega fyrir mótið en hafði grun um að hann gæti náð yfir 1,90 m. „Ég ætlaði að keppa í kúluvarpi og bæta mig vel í þeirri grein. Ég tók nokkrar æfingar en tognaði svo illa á putta að ég gat ekki keppt. Það fór það mikið í taugarnar á mér að ég skráði mig bara í hástökkið,“ segir Örn.

„Ég hafði trú á að ég gæti farið yfir þessa hæð og var svo hátt yfir henni þegar það tókst. Ég veit að ég á því nokkuð inni og get stokkið hærra,“ segir Örn sem felldi 1,94 m þrívegis. „Það var svekkjandi enda var ég afar nálægt því að fara yfir.“

Síðasti séns að vinna Styrmi

Einar Daði hafði nokkra yfirburði í greininni. Hann byrjaði í 1,94 m, svo 1,97 m og loks 2,0 m. Hann fór yfir allar hæðir í fyrstu atrennu og tryggði sér sigurinn í lokastökkinu, þar sem Styrmir Dan felldi 2,0 m þrívegis.

Styrmir Dan, sem verður sextán ára síðar í mánuðinum, á öll aldursflokkamet fimmtán ára og yngri í greininni og á framtíðina fyrir sér. Örn viðurkennir að líklega hafi þetta verið síðasta tækifærið hans til að vinna Styrmi í hástökki.

„Ég hefði haft gaman af því,“ segir Örn í léttum dúr. „Þetta er afar seigur drengur – er duglegur að æfa og ég hef mikla trú á honum.“

Hef bætt mig í öllum þáttum

Örn er einn sex Íslendinga sem hafa kastað spjótinu yfir 75 m eftir að núverandi tegund var innleidd árið 1986. Tveir á þeim lista eru æfingafélagar hans – Guðmundur Sverrisson (þriðji með 80,66 m) og Sindri Hrafn Guðmundsson (fimmti með 77,28 m) – auk þess sem hinn sautján ára Dagbjartur Daði Jónsson er einnig í sama æfingahópi. Þjálfari þeirra er Íslandsmethafinn og formaður Frjálsíþróttasambands Íslands, Einar Vilhjálmsson.

„Ég var meiddur allt síðasta sumar og vona því að ég nái að bæta mig vel í spjótkastinu í sumar,“ segir Örn sem á lengst 75,96 m sem hann kastaði sumarið 2012. „Æfingarnar hafa gengið það vel að ég hef bætt mig í öllu því sem hægt er að tengja við spjótkastið. Tæknin hjá mér hefur batnað til muna.“

Væri gaman að fara yfir 80 metrana

Kasta þarf 82 m til að komast inn á HM í frjálsum sem fer fram í Kína í sumar. „Það er stutt í 80 m hjá mér og væri gaman að ná því, að ég tali ekki um að komast á HM. En stóra markmiðið er að komast á EM 2016 þar sem lágmarkið er 78 m. Það væri mjög skemmtilegt ef Íslandi ætti að minnsta kosti þrjá keppendur þar,“ segir Örn og bætir við að það ríki góð stemning á milli þeirra félaga á æfingum þótt þeir komi úr þremur mismunandi félögum – Örn úr FH, Sindri Hrafn úr Breiðabliki og Guðmundur og Dagbjartur úr ÍR.

„Það er gaman hjá okkur á æfingum en samkeppnin heldur okkur einnig á tánum. Ef maður stendur sig ekki þá veit maður að það er stutt í að einhver annar komi og taki þig í gegn. Einar er svo afar reynslumikill og kann þetta allt. Það er gott að hafa hann með okkur.“

Örn hefur þó ekki sagt skilið við hástökkið og stefnir á að stökkva aftur í bikarkeppni FRÍ í lok mánaðarins. „Ég á best 1,97 m og væri gaman að sjá hvort ég geti náð því aftur.“