Dagskrá FÍ deildarbikarsins milli jóla og nýárs er tilbúin

Handknattleikssamband Íslands hefur gefið út dagskrá FÍ deildarbikars HSÍ en eins og undanfarin ár fer hann fram milli jóla og nýárs.

Leikirnir fara allir fram í Íþróttahúsinu við Strandgötu í Hafnarfirði en það hefur skapast hefð fyrir því að deildarbikarinn fari fram þar.

Karlalið Aftureldingar var síðasta liðið til þess að tryggja sér sætið þegar liðið vann 28-26 sigur á ÍBV í Eyjum um helgina en við þessi úrslit höfðu liðin sætaskipti í töflunni.

Afturelding komst upp fyrir ÍBV og í 4. sætið en fjögur efstu liðin um jólin, í karla- og kvennaflokki, tryggja sér sæti í undanúrslitunum.

Í karlaflokki keppa því Haukar, Valur, Fram og Afturelding.

Í kvennaflokki keppa Grótta, ÍBV, Valur og Fram. Valur og Fram eru því með báða meistaraflokka sína í úrslitunum í ár.

Keppni fer fram sunnudaginn 27. desember og mánudaginn 28. desember. Undanúrslitaleikirnir fjórir fara allir fram á sunnudeginum og daginn eftir verður síðan spila til úrslita.

Karlalið Vals og kvennalið Fram unnu titilinn í fyrra og geta því bæði varið hann í ár.



Leikjadagskrá FÍ deildarbikarsins 2015



Sunnudagur 27. desember

Klukkan 12.00 - Undanúrslit kvenna

Grótta-Fram

Klukkan 14.00 - Undanúrslit karla

Valur-Fram

Klukkan 16.00 - Undanúrslit kvenna

Valur-ÍBV

Klukkan 18.00 - Undanúrslit karla

Haukar-Afturelding



Mánudagur 28. desember

Klukkan 18.30

Úrslitaleikur kvenna

Grótta/Fram - Valur/ÍBV

Klukkan 20.30

Úrslitaleikur karla

Valur/Fram - Haukar/Afturelding