Ólafía komst áfram en Valdís er úr leik

Ólafía Þórunn Kristinsdóttir úr GR á enn möguleika á því að komast á evrópsku mótaröð kvenna í golfi eftir að hún ein Íslendinga komst í gegnum niðurskurðinn á úrtökumóti fyrir mótaröðina.

Ólafía Þórunn komst nokkuð örugglega í gegnum niðurskurðinn en 67 kylfingar komust áfram. Ólafía Þórunn er í 35. til 40. sæti eftir fjóra hringi. Ólafía lék á 71 höggi í gær eða einu höggi undir pari en hún fékk þrjá fugla og tvo skolla í dag.

Ólafía Þórunn er aðeins tveimur höggum frá því að vera á meðal 30 efstu í mótinu sem fá fullan keppnisrétt á evrópsku mótaröðina á næstu leiktíð. Með því að komast í gegnum niðurskurðinn hefur Ólafía áunnið sér inn takmarkaðan keppnisrétt á mótaröðinni á næstu leiktíð. Hún er núna aðeins hársbreidd frá því að komast inn á næst sterkustu mótaröð í kvennagolfinu með fullan keppnisrétt.

Valdís Þóra Jónsdóttir úr Leyni er aftur á móti úr leik í mótinu eftir erfiðan dag. Valdís lék fjórða hringinn á 81 höggi eða níu höggum yfir pari og komst ekki í gegnum niðurskurðinn. Valdís fór illa af stað og náði sér ekki á strik. Slæmur endir hjá Valdísi Þóru eftir góða byrjun.

Lokahringurinn fer fram í dag og verður spennandi að sjá hvort Ólafíu Þórunni takist að verða annar kylfingurinn í íslenskri golfsögu til að tryggja sér keppnisrétt á evrópsku mótaröð kvenna. Ólöf María Jónsdóttir úr Keili var fyrst íslenskra kvenna til að afreka það.