Fertugur Tiger ætlar sér stóra hluti á nýju ári

Tiger Woods ætlar sér að halda áfram að berjast um titla næstu tíu árin þrátt fyrir að meiðsli hafi plagað hann síðustu árin.

Woods, sem verður fertugur síðar í mánuðinum, hefur unnið fjórtán risamót á ferlinum en síðasti sigurinn kom árið 2008.

Síðan þá hefur mikið gengið á. Upp komst um stórfellt framhjáhald hans og aðra bresti í einkalífinu sem vöktu heimsathygli. Hann hefur einnig glímt við þrálát bakmeiðsli og sjaldan náð sér almennilega á strik á vellinum þegar hann hefur reynt að spila.

Sjá einnig: Ekkert ljós í enda ganganna hjá Tiger

„Þetta var erfitt ár og tók á fyrir líkamann minn,“ skrifaði Woods í pistli sem birtist á heimasíðu hans. „Ég þurfti að breyta um sveiflutækni því hún var hörmuleg í upphafi ársins. Ég spilaði ekki í langan tíma því ég var fastur.“

Hann segir að það hafi verið einkar svekkjandi að hafa ekki náð að fylgja breytingunni almennilega eftir og þegar það hafi loksins gengið betur hjá honum að þá hafi heilsan brugðist honum.

„Ég hef farið í tvær aðgerðir á baki síðan á Wyndham-mótinu og þetta hefur verið rússíbanareið allt árið. Ég hef verið langt niðri en líka gert nokkuð góða hluti líka.“

„Ég hlakka mest til þess á næsta ári að fá að spila aftur. Ég hef saknað þess og vil fá að gera það verkjalaus. Það hefur ekki gerst hjá mér í langan tíma. Ég hef átt spretti hér og þar undanfarin ár en ég væri mest til í að vera heill heilsu í langan tíma.“