Haas: Undirvagninn okkar betri en Ferrari

Gene Haas, eigandi Haas F1 liðsins sem hefur keppni í Formúlu 1 á næsta ári segir a undirvagn liðs síns verði líklegast betri en undirvagn Ferrari liðsins.

Haas F1 er í samstarfi við Dallara, þekktan ítalskan framleiðanda undirvagna. Haas segir að undirvagn liðsins sé hannaður með annarri nálgun en Ferrari notar.

Haas viðurkennir að vissulega komi mikið af hlutum í bílinn frá Ferrari, enda liðin í tæknilegu samstarfi.

„Töluvert af vélinni, gírkassinn og fjöðrunin mun koma frá Ferrari, en það er margt sem við gerum sjálf,“ sagði Haas í viðtali við Sky Sports.

„Ég held að undirvagninn okkar verði töluvert ólíkur undirvagni Ferrari vegna þess að við erum að hanna þá í sitthvoru lagi. Við teljum að okkar undirvagn verði betri að vissu leyti vegna þess að við notum aðra nálgun en Ferrari og við teljum okkur hafa betri hönnun í höndunum,“ bætti Haas við.

Liðseigandinn segir að það sé ekkert því til fyrirstöðu að nýja liðið geti orðið betra en Ferrari, hann telur jafnvel að Ferrari geti lært eitthvað af nýliðunum.

„Ferrari fer hefðbundnari leiðir, þeir ætla að halda sig við það sem þeir hafa verið að gera lengi. Ég held að við getum unnið á þar,“ sagði Haas.