Semur lög og rifjar upp gamla tíma

Högni Egilsson leggur nú land undir fót og heldur tónleika á stöðum sem hann hefur sjaldan spilað á áður. Högni mun ferðast einsamall, sem er nýlunda fyrir þennan kappa sem hefur gert garðinn frægan með Hjaltalín og GusGus. „Ég er alls ekki vanur því að ferðast einsamall,“ segir hann glaður í bragði og bætir við: „Ætli þetta verði ekki góð sjálfskoðun, að keyra svona langt einn síns liðs?“

Högni leggur af stað á á morgun og er fyrsta stopp á Hornafirði. Högni mun einnig leika á Egilsstöðum, Eskifirði, Siglufirði og Akureyri á þessu tónleikaferðalagi sínu.

„Ég valdi svolítið tónleikastaði eftir því hvar er að finna góða flygla. Mér finnst ótrúlega skemmtilegt að fá tækifæri til að ferðast um landið og spila þessi lög og halda út svona prógrammi,“ útskýrir Högni. Eins og Fréttablaðið sagði frá í síðasta mánuði hóf Högni tónleikaferðalagið í Hafnarfirði, þar sem hann kom fram í Gamla bíói. Þetta er í fyrsta sinn sem Högni heldur tónleika einn síns liðs og er hluti af þeirri upplifun að ferðast bara með sjálfum sér.

„Ætli ég muni ekki ræða málin við ímyndaðan vin sem ég „tek“ með mér í ferðlagið? Ég mun sjálfsagt vera að rangla um í hausnum á sjálfum mér. Minnast gamalla tíma, syngja eitthvað skemmtilegt. Ég gæti líka trúað því að einhver lög verði til á ferðalaginu.“

Fyrstu tónleikar Högna verða á morgun á Hornafirði en hann á góðar minningar þaðan. „Síðast þegar ég fór þangað var ég, að mig minnir, nítján ára gamall. Ég fór þá með Snorra Helgasyni vini mínum á Humarhátíð. Við enduðum í góðum gleðskap með sjómönnum að syngja og glamra á gítar alla nóttina. Það var einstaklega skemmtilegt.“