Samkvæmt heimildum Fréttablaðsins mun KSÍ ekki notast við sömu viðmið og í fyrra í kosningu leikmanna Pepsi-deildarinnar á efnilegasta leikmanni Íslandsmótsins.
Þar til í fyrra var miðað við að leikmenn væru gjaldgengir í U21 árs landsliðið og brá leikmönnum deildarinnar því mikið þegar þeir máttu aðeins kjósa leikmenn fædda 1995 og yngri.
Hvorki Ólafur Karl Finsen, Stjörnunni, né Aron Elís Þrándarson, Víkingi, sem báðir áttu frábært sumar í fyrra voru gjaldgengir svo dæmi sé tekið.
Elías Már Ómarsson, Keflvíkingur, var kosinn bestur og vel að því kominn, en hann fór svo í atvinnumennsku eftir tímabilið.
Eins og Fréttablaðið greindi frá í fyrra hefðu aðeins ellefu af þeim 31 leikmanni sem í gegnum tíðina hafa verið kosnir efnilegastir verið gjaldgengir undir þessum skilmálum.
Leikmenn á borð við Hörð Sveinsson, Keflavík (kosinn efnilegastur 2005), og Birki Má Sævarsson, Val (kosinn efnilegastur 2006), voru báðir 22 ára þegar þeir voru valdir en enn gjaldgengir í U21 árs landsliðið.
Hvort um hrein mistök hafi verið að ræða hjá KSÍ í fyrra er ekki vitað, en þessu verður breytt aftur í fyrra horf eftir því sem Fréttablaðið kemst næst.
Aldurinn sem notast var við í fyrra hefði þrengt hringinn mikið í ár þar sem aðeins tveir leikmenn fæddir 1996 eða fyrr hafa spilað eitthvað af ráði í deildinni. Það eru Sindri Kristinn Ólafsson, markvörður Keflavíkur, og Albert Hafsteinsson, miðjumaður ÍA.
Báðir eru ágætlega vel að tilnefningunni komnir enda báðir staðið sig mjög vel, en þeir fá nú samkeppni frá leikmönnum í U21 árs liðinu á borð við Oliver Sigurjónsson, Breiðabliki, Orra Sigurð Ómarsson, Val, Höskuld Gunnlaugsson, Breiðabliki, Böðvar Böðvarsson, FH, og Viðar Ara Jónsson, Fjölni.
