Fanndís: Þetta er mikill heiður

„Þetta er frábært, bæði fyrir mig og liðið. Það eru margir Blikar hérna í dag, stuðningsmenn og annað og maður bara gríðarlega stoltur af því að vera Bliki,“ sagði Fanndís Friðriksdóttir, leikmaður Breiðabliks, sátt eftir að hafa tekið við verðlaununum sem besti leikmaður nýafstaðins tímabils í Pepsi-deild kvenna í dag.

Breiðablik sópaði að sér verðlaunum þegar Pepsi-deild kvenna var gerð upp í húsakynnum Ölgerðarinnar í dag en Fanndís var valin best, Andrea Rán Hauksdóttir efnilegust og Þorsteinn Halldórsson, þjálfari liðsins, var valinn þjálfari ársins.

„Þetta er mikill heiður, það er alltaf gaman að fá einstaklingsverðlaun og ég er stolt af þessu enda búin að hafa mikið fyrir þessu,“ sagði Fanndís sem var á sínum tíma valin efnilegasti leikmaður deildarinnar.

„Þetta er öðruvísi tilfinningin, hitt var líka gaman en þetta er önnur tilfinning. Rétt eins og þegar við urðum Íslandsmeistarar, tilfinningin er alltaf sú sama en það er öðruvísi að vera í lykilhlutverki heldur en á bekknum þótt Íslandsmeistaratilfinningin sé sú sama.“

Fanndís sagði að liðið myndi ekki hætta hér.

„Við erum með gríðarlega gott lið og við þurfum að halda þessu áfram. Ég hef ekki orðið bikarmeistari áður með Breiðablik og það er markmiðið á næsta ári.“

Kópacabana, stuðningsmannasveit liðsins, sló í gegn á þessu tímabili en sveitin fjölmennti á alla leiki liðsins, þar á meðal leikinn á Akureyri þar sem titilinn kom í höfn.

„Þeir eiga þetta fyllilega skilið enda búnir að hjálpa okkur mikið. Það er ótrúlega skemmtilegt að hafa svona dygga og góða stuðningsmenn sem eltu okkur alla leið til Akureyrar. Við erum þeim mjög þakklátar eftir tímabilið.“

Fanndís var liðsfélögum sínum þakklát fyrir aðstoðina á þessu tímabili.

„Spilamennska liðsins í sumar var frábær, sama hvort þú talar um markvörsluna, varnarleikinn eða sóknarleikinn.  Ég fengi þessi verðlaun ekki án þeirra og ég tek við þeim fyrir okkur allar.“