Aron fékk frí hjá Werder Bremen vegna fráfalls ömmu sinnar

Aron Jóhannsson, framherji Werder Bremen í þýsku 1. deildinni í fótbolta, er staddur á Íslandi þessa dagana til að fylgja ömmu sinni, Jónu Gróu Sigurðardóttur, til grafar.

Amma hans lést 17. september, en í minningargrein föður hans, Jóhanns Gíslasonar, um tengdamóður sína í Morgunblaðinu í dag segir hann frá því hversu mikinn áhuga Jóna Gróa hafði á Aroni og knattspyrnuferli hans.

Aron gat ekki spilað með Werder Bremen í 3-0 tapi liðsins gegn Bayer Leverkusen um síðustu helgi vegna meiðsla og æfði einn á sunnudaginn áður en hann hélt heim til Íslands í gærmorgun.

„Á fimmtudaginn mun læknir liðsins skoða Aron og þá verður ákveðið hvort hann geti hafið æfingar að fullu,“ segir Marita Hanke, fjölmiðlafulltrúi Bremen, við fréttasíðu MLS-deildarinnar.

Aron er meiddur í nára, en þýska blaðið Kicker greindi frá því í gær að Viktor Skripnik, þjálfari Werder Bremen, er vongóður um að Aron verði til taks fyrir ferðina til Hannover á laugardaginn.

Aron er búinn að skora tvö mörk í fjórum leikjum fyrir Bremen-liðið sem er í 13. sæti þýsku 1. deildarinnar eftir þrjú töp í röð.