Permane: Nýja Mercedes vélin 0,3 sekúndna virði

Uppfærslan sem Mercedes kom með til Ítalíu er um 0,3 sekúndum hraðari á hring á Monza ef marka má orð Alan Permane, skipulagsstjóra Lotus liðsins.

Einungis Lewis Hamilton naut nýju vélarinnar við á Monza. Vandamál kom upp í vél Nico Rosberg á laugardeginum.

Hamilton vann keppnina með rúmlega 25 sekúndna forskoti á Sebastian Vettel á Ferrari.

Lotus hefur enn ekki fengið uppfærðu vélarnar. Permane telur vélina spara gríðarlegan tíma á hverjum hring, miðað við gömlu gerðina sem Lotus notar nú.

„Mér skilst að það muni 0,3 sekúndum (á Monza). Ég veit það ekki fyrir víst, við höfum ekki rætt við tengiliði okkar hjá Mercedes um málið. Auðvitað tökum við öllu sem við getum fengið fegins hendi, en við erum mjög ánægð með það sem við höfum,“ sagði Permane.

„Þriðju vélarnar okkar fóru í bílana á Monza og þær gengu gallalaust, en ég veit ekki hvert planið er og hvort fjórðu vélarnar okkar verði af nýjustu kynslóðinni eða ekki,“ sagði Permane að lokum.