Stenson og Fowler efstir fyrir lokahringinn á TPC Boston

Það vantar ekki spennuna fyrir lokahringinn á Deutsche Bank meistaramótinu sem fram fer á TBC Boston vellinum ef þegar 18 holur eru óleiknar leiðir fyrrum besti kylfingur heims, Svíinn Henrik Stenson, með einu höggi.

Stenson lék frábært golf á þriðja hring í gær og kom inn á 65 höggum eða sex undir pari en hann er á 14 höggum undir pari samtals.

Hinn geysivinsæli Rickie Fowler er þó aðeins einu höggi á eftir Stenson á 13 undir pari en Sean Ohair og Matt Jones deila þriðja sætinu á 12 höggum undir pari.

Charley Hoffman, sem leiddi mótið eftir tvo hringi, spilaði sig úr toppbaráttunni á þriðja hring sem hann lék á 76 höggum eða fimm yfir pari.

Hann er þó í aðeins skárri málum en besti kylfingur heims, Rory McIlroy, en hann er meðal neðstu manna af þeim sem komust í gegn um niðurskurðinn á tveimur yfir pari.

Á morgun kemur í ljós hvaða 70 kylfingar fá þátttökurétt á BMW meistaramótinu í næstu viku en þar heldur úrslitakeppni PGA-mótaraðarinnar áfram þar sem leikið er um marga milljarða króna í verðlaunafé.

Bein útsending frá lokahringnum á TPC Boston hefst á Golfstöðinni klukkan 15:30 í dag.