Þetta var annað dekkið sem sprakk um helgina en á föstudaginn hvellsprakk dekk undir Mercedes bíl Nico Rosberg á æfingu.
„Þetta má ekki gerast. Hefði þetta gerðst 200 metrum fyrr, stæði ég ekki hér núna,“ sagði Vettel.
„Ég veit ekki hvað þarf til. Þetta kemur alltaf upp annað slagið en enginn virðist vilja ræða þetta, það er óásættanlegt að dekkin springi,“ bætti fjórfaldi heimsmeistarinn við.
Yfirmaður kappakstursmála hjá Pirelli, Paul Hembrey segir dekkið hafa sprungið vegna gríðarlegs slits. Ferrari hafði þó fengið upplýsingar fyrir keppnina um að dekkin ættu að komast 40 hringi en það sprakk eftir 28 hringja notkun.
„Það var komið að lokum endingartíma og þegar dekk komast þangað geta þau valdið vandræðum. Sama hvaða dekk það er,“ sagði Hembrey.
Hembrey viðurkenndi þó að Pirelli hefði ekki varað Ferrari við að svona gæti farið ef dekkið yrði notað svona lengi.
Vettel segir Pirelli alltaf bregða sömu svörum fyrir sig: „Það var skurður í dekkinu, brot úr bíl, yfirbygging bílsins skar dekkið eða ökumaður fór út fyrir braut.“
„Við munum ræða málin okkar á milli,“ sagði Vettel og vísar til þess að ökumenn ætla að hittast fyrir keppnina á Monza eftir tvær vikur og ræða stöðu mála.
„Eitthvað þarf að gera til að auka öryggið. Einhvern veginn þurfum við að sjá fyrr ef þetta er að fara að gerast,“ sagði Rosberg.
„Ef það er ekki hægt að laga vandamálið á næstu tveimur vikum, af því að Monza er líka hröð braut, þurfum við að vera með okkar afstöðu á hreinu,“ bætti Rosberg við.
Skemmst er að minnast breska kappakstursins frá 2013 þar sem Pirelli dekk sprungu ansi ört og höfðu talsverð áhrif á úrslit kappakstursins. Gallað dekk kostaði Hamilton forystuna í þeirri keppni.
