Íslenski fótboltaleikurinn Kickoff CM kemur út

Nýr tölvuleikur, Kickoff CM, kemur út í dag og er það íslenska hugbúnaðarfyrirtækið Digon Games sem gefur leikinn út.

„Það er virkilega ánægjulegt að geta komið leiknum á framfæri við Íslendinga. Þetta er fyrsta skrefið í markaðssetningu leiksins af okkar hálfu og hlökkum við til að sjá viðbrögðin við leiknum á næstu vikum og mánuðum,“ segir Jón Thoroddsen, framkvæmdastjóri Digon Games.

„Leikurinn er eins og stendur á ensku og ég myndi segja að þeir markaðir sem við erum að horfa á væru England og Bandaríkin, en sá síðarnefndi er mjög spennandi fyrir okkur. Þar eru fáir svona leikir en áhuginn á knattspyrnu er að vaxa alveg gríðarlega mikið. Meira mætt á leikina og betri knattspyrnumenn að spila þar.“

Digon Games er stofnað um þennan umrædda leik og Jón segir að skipta megi vinnunni í tvennt. Fyrst hafi verið hannaður nokkuð hefðbundinn knattspyrnustjóraleikur. Síðan hafi sá leikur verið þróaður áfram að spilaranum. „Síðan hefur hugbúnaðarþróunin tekið um tvö ár,“ segir Jón.