Bolt stakk Gatlin af á lokasprettinum

Usain Bolt landaði tvennunni í spretthlaupunum á HM í Peking með því að vinna 200 metra hlaupið í dag.

Sem fyrr var hlaupið einvígi á milli Bolt og Bandaríkjamannsins Justin Gatlin. Margir spáðu því að Gatlin myndi hafa betur en það gerðu líka margir fyrir 100 metra hlaupið.

Bolt stakk upp í alla efasemdarmenn þá og hann gerði það aftur í dag í 200 metra hlaupinu.

Þeir voru jafnir eftir 100 metra en Bolt stakk Gatlin hreinlega af á lokakaflanum og kom í mark á 19,55 sekúndum sem er besti tími ársins. Gatlin varð annar á 19,74 sekúndum.

Bolt er það með búinn að vinna tíu gull í sögu HM en það er met. Allyson Felix jafnaði met Bolt með níu gullum rétt áðan er hún vann 400 metra hlaup. Bolt svaraði með öðru gulli.