Fylgir því meiri spenna að spila heima á Íslandi

Hljómsveitin Of Monsters and Men heldur sína fyrstu tónleika á Íslandi í um tvö ár, þegar sveitin kemur fram á tvennum tónleikum í Hörpu annað kvöld og á fimmtudagskvöld.

„Það er alltaf gaman að koma heim og spila, það fylgir því ákveðin spenna sem maður finnur ekki fyrir annars staðar. Maður verður aðeins stressaðri, sem er gott. Heldur manni á tánum,“ segir Ragnar Þórhallsson, annar söngvari og einn gítarleikari hljómsveitarinnar Of Monsters and Men, spurður út í tilfinninguna fyrir tónleikunum.

Ragnar og félagar hafa verið á tónleikaferð um allan heim undanfarna mánuði og hefur hún að mestu gengið eins og í sögu. „Hingað til hafa hlutir gengið mjög vel. Við erum búin að tækla Norður-Ameríku ansi sterkt, Evrópu, Ástralíu og Japan. Við misstum reyndar bassaleikarann okkar hann Kristján í nokkrar vikur vegna salmonellu en hann er kominn sterkur til baka,“ segir Ragnar spurður út í tónleikaferðina.

Fleiri textamyndbönd væntanleg

Nýjasta plata sveitarinnar, Beneath the Skin, hefur fengið prýðis dóma í erlendum miðlum og þá hafa textamyndbönd sveitarinnar fengið mikla athygli. Hvaðan kemur hugmyndin að textamyndböndunum?

„Sú hugmynd spratt upp að fá mismunandi fólk til að syngja og túlka lögin okkar á sinn hátt. Pælingin fléttast vel við textana á plötunni. Viðfangsefnin eru mannlegri á þessari plötu og það hefur verið bæði áhugavert og lærdómsríkt fyrir okkur að fylgjast með alls konar mismunandi fólki á öllum aldri túlka okkar skilaboð,“ útskýrir Ragnar. Sveitin ætlar sér að gera textamyndbönd við öll lögin á plötunni.

Fólk á borð við Sigga Sigurjóns, Natalie G. Gunnarsdóttur og Atla Frey Demant hefur komið fram í textamyndböndunum en það er valið af meðlimum sveitarinnar. „Við tökum oftast eitt lag fyrir í einu. Hugsum um manneskjur sem við tengjum við lagið bæði líkamlega og og hvað snertir persónuleika. Hugsum svo hvernig þau gætu túlkað lagið og hvernig við myndum hugsanlega túlka það. Að lokum endum við með nokkur nöfn sem við tékkum á og ef þau er til þá erum við til.“

Óvenjulegt ástarsamband



Fyrir utan textamyndböndin hefur sveitin sent frá sér tvö ný tónlistarmyndbönd við lögin Crystals og Empire, sem hafa einnig fengið mikið lof.

Meðlimir sveitarinnar koma fram í myndbandinu við lagið Cryst­als en þeir koma þó ekki fram í myndbandinu við lagið Empire sem kom út fyrir skömmu. 

„Hugmyndin var að gera eins konar stuttmynd og okkur fannst það sterkara að vera ekki í myndbandinu. Strax og hljómsveit er í myndbandi þá fer athyglin að dragast að henni og oft er það flott en oft er það líka truflandi. Í þessu tilfelli fannst okkur það geta verið truflandi,“ segir Ragnar. 

Hvaðan kemur hugmyndin að myndbandinu? „Við vissum að við vildum byggja söguþráðinn á óvenjulegu ástarsambandi s.s. einhverju sem mögulega er litið hornauga í okkar samfélagi. Upprunalega var hugmyndin að sýna samband eldri konu og ungs manns en eftir miklar vangaveltur með leikstjóra myndbandsins, henni Tabitha Denholm, þá var þetta lendingin. Hugmyndin var ekki að sjokkera fólk heldur að sýna að það er fegurð í öllu, líka því sem að bregður frá norminu.“

Skoða alltaf Ísland fyrst

Myndbandið var tekið upp í Los Angeles en Ragnar segir sveitina ávallt skoða möguleikana á Ísland við framleiðslu á svona hlutum. „Við byrjum oftast á því að kanna möguleikana á að gera svona hluti á Íslandi. Hingað til hafa öll textamyndböndin okkar og hitt tónlistarmyndbandið fyrir nýju plötuna okkar verið tekin á Íslandi. Í þetta skipti hentaði það ekki mjög vel. Við unnum með leikstjóranum Tabitha Denholm. Hún hefur aðsetur í Los Angeles og vinnur mikið þaðan. Það hentaði því best að gera þetta verkefni þar,“ segir Ragnar.